Шымкент қаласының Арбат демалыс аймағында қала тұрғындары мен жастарға арналған ақпараттық-насихаттық шара өтті. Іс-шараның негізгі мақсаты — жұмыспен қамту, кәсіпкерлікке қолдау және оқу мүмкіндіктері туралы мемлекеттік бағдарламаларды кеңінен түсіндіру және халықты белсенді түрде еңбек нарығына тарту.
Шараны ұйымдастырушылар – Мансап орталығы мен Жастар ресурстық орталығының мамандары – тұрғындармен ашық диалог құрып, нақты сұрақтарына жауап берді. Мамандар келушілерге мемлекеттік қолдау тетіктерін таныстырып, әсіресе төмендегі бағыттар бойынша жан-жақты ақпарат ұсынды:
-
тұрақты және уақытша жұмыс орындарына орналасу мүмкіндіктері;
-
мемлекеттік гранттар арқылы кәсіп ашу жолдары;
-
қысқа мерзімді кәсіптік курстар мен қайта даярлау бағдарламалары;
-
жастар практикасы, «Алғашқы жұмыс орны», «Күміс жас», қоғамдық жұмыс және әлеуметтік жұмыс сияқты субсидияланатын бағыттар;
-
өңіраралық қоныс аудару тетіктері.
Мамандар шара барысында әрбір бағдарламаға қатысу шарттарын, қажетті құжаттар тізімін және өтінім беру тәртібін түсіндіріп, ақпараттық парақшалар таратты. Сонымен қатар, жастарға оқуға бағытталған қолдау шаралары мен мемлекет ұсынатын білім гранттары туралы да толық мәлімет берілді.
Қатысушылардың басым көпшілігі өздерін қызықтырған мәселелер бойынша нақты жауап алып, болашақтағы жоспарларына бағыт алғандарын айтты. Әсіресе кәсіпкерлікпен айналысуға ниетті азаматтар үшін гранттық бағдарламалар мен бизнес бастауға арналған оқыту курстары үлкен қызығушылық тудырды.
Іс-шараның бір ерекшелігі – түсіндіру жұмыстары еркін форматта, ашық аспан астында ұйымдастырылды. Бұл тәсіл тұрғындардың белсенді қатысуына, сұрақ қоюына және нақты кеңес алуына қолайлы жағдай туғызды.
Мансап орталығының мамандары мұндай кездесулерді қала аумағындағы барлық аудан мен тұрғын алаптарында жүйелі түрде өткізуді жоспарлап отыр. Олар үшін басты мақсат — халықтың еңбекке араласуын арттыру және мемлекет тарапынан ұсынылатын мүмкіндіктерді әр азаматқа жеткізу.
Шара соңында келушілер алдағы уақытта да осындай түсіндіру жұмыстары жиі ұйымдастырылса деген ұсыныстарын білдірді. Ұйымдастырушылар тарапынан тұрғындардың белсенділігі жоғары бағаланып, келесі кездесулерде нақты қызмет көрсету, құжат жинауға көмек беру секілді практикалық қолдау көрсету жоспарланып отыр.
Осы шара арқылы мемлекеттік қолдаудың ашық әрі қолжетімді екені тағы бір мәрте дәлелденді. Ал тұрғындар үшін бұл — нақты ақпарат алып, өз әлеуетін дамытуға жол ашатын тиімді алаң болды.
