Жетісай ауданында Конституция күні қарсаңында 2600 тұрғын табиғи газға қосылды

Жетісай ауданында Конституция күні қарсаңында 2600 тұрғын табиғи газға қосылды

Түркістан облысында елді мекендерді табиғи газбен қамту жұмыстары кезең-кезеңімен әрі жүйелі түрде жүзеге асырылып келеді. Әсіресе, бұл бағытта Жетісай ауданында ауқымды істер атқарылуда. Қазіргі таңда аудандағы 105 елді мекеннің 89-ы көгілдір отынға қосылып, газдандыру көрсеткіші 84,7 пайызды құрап отыр. Бұл – тұрғындардың өмір сүру сапасын арттыру бағытындағы мемлекеттік бастамалардың нақты нәтижесі.

Жуырда Қазақстан Республикасының Конституциясы күні қарсаңында Жетісай ауданында тағы екі елді мекен — Жетіқазына және Әлімбетов ауылдарына табиғи газ берілді. Бұл айтулы оқиға Ж.Ералиев ауылдық округіне қарасты елді мекендердің тұрғындары үшін үлкен қуаныш болды. Бұған дейін бұл ауылдардың тұрғындары қатты отын жағып, күл шығарып, тұрмыста едәуір қиындықтарға тап болатын. Енді 2600-ге жуық адам табиғи газды еш кедергісіз, заманауи және қауіпсіз тәсілмен пайдалану мүмкіндігіне ие болды.

Салтанатты шараға аудан әкімі Серік Мамытов пен «QazaqGaz Aimaq» АҚ Түркістан өндірістік филиалының директоры Ақылбек Абилдиев арнайы қатысып, газдың іске қосылуына куә болды. Тұрғындармен тілдесіп, олардың пікірін тыңдап, газдың қолжетімді болуы өмір сүру сапасына оң әсер ететінін атап өтті. Жергілікті билік пен газ саласындағы мамандардың бірлескен жұмысының арқасында қысқа мерзімде осындай ірі инфрақұрылымдық жоба сәтті жүзеге асты.

Жетісай ауданы бойынша газдандыру жұмыстарының қарқыны соңғы жылдары едәуір артқан. Өткен жылы Ж.Ералиев ауылдық округінің Абай ауылында, Қызылқұм ауылдық округіне қарасты Қызылқұм, Қызылту және Қарасақал ауылдарында 6600 тұрғын көгілдір отынға қосылған болатын. Ал 2025 жылдың басынан бері Түркебай, Жалпаққұм, Алғабас, Ақтөбе, Қосқұдық, Мақталы, Халықтар достығы, Күрішті, Әбдіхалық және Мырзашөл, Дархан елді мекендерінің 11 мыңға жуық тұрғыны газ пайдалануға қол жеткізді.

Бұның барлығы — тұрғындардың тұрмыс жағдайын жақсартуға бағытталған мақсатты жұмыстардың жемісі. Газбен қамту тек қана үй жылыту үшін емес, сонымен қатар денсаулық пен экологиялық тазалықты қамтамасыз етудің де бірден-бір жолы. Бұрын қатты отынды қолданған тұрғындар түрлі қауіпке, оның ішінде көмірдің түтінінен туындайтын ауруларға тап болса, енді бұл мәселелердің алдын алуға мүмкіндік бар.

Жетісай ауданында табиғи газбен қамтуды 100 пайызға жеткізу жоспары нақты жүзеге асырылып келеді. Жыл соңына дейін Қарой, Атақоныс, Сейфуллин, Сарқырама, Датқа, Көбек, Киров және 1-Мамыр сияқты бірқатар елді мекендерге газ беру жоспарлануда. Нәтижесінде тұтынушылар саны тағы да 10 400 адамға артып, бұл көрсеткіш 2027 жылға қарай 100 пайызға жетуі тиіс. Яғни, ауданның барлық тұрғындары толықтай көгілдір отынмен қамтылатын болады.

Табиғи газдың қолжетімділігі тек инфрақұрылыммен шектелмейді. Бұл — тұрғындардың өмір сапасына, экономикалық жағдайына, әлеуметтік тұрақтылығына оң әсер ететін фактор. Қарапайым отбасы үшін қатты отын сатып алуға жұмсалатын шығын айтарлықтай қысқарады. Сонымен қатар, еңбек өнімділігі мен бос уақытты тиімді пайдалану мүмкіндігі артады.

Түркістан облысында газдандыру — облыс әкімдігінің басты басымдықтарының бірі. Бұл бастама тек Жетісаймен шектелмей, өңірдің барлық аудандарында жоспарлы түрде жүргізілуде. Әрбір ауылға газ жеткізу арқылы тұрғындардың әлеуметтік әл-ауқаты мен экологиялық қауіпсіздік деңгейі жоғарылайды. Бұл — ұзақмерзімді әрі тұрақты дамуға бағытталған саясаттың жарқын үлгісі.

Қазір оқылып жатыр

Толығырақ

Бейжің, 2025 жылғы 27-30 тамыз – Шанхай ынтымақтастық ұйымына (ШЫҰ) мүше мемлекеттердің ұлттық үйлестірушілері кеңесінің кезекті отырысы өтті. Қазақ тарапынан...