Осыдан бірнеше күн бұрын Шымкент қаласындағы автобустарға жолақыны «Tolem» электронды жүйесімен төлеу енгізілген болатын. Осы орайда әлеуметтік желі белсендісі Ғасыр Құралбайұлы өзінің Facebook желісіндегі парақшасына қызықты жазба қалдырды. Оның айтуынша, аталған жүйенің логотипі плагиат сияқты. Бұл белгі 2016 жылы АҚШ президенті Дональд Трамптың сайлауалды логотипі болған екен.
«Шымкентте «Tolem» жүйесі енгізгені белгілі. Бірақ логотипке келгенде дизайнелер «Copy-Past» жүйесін іске қосыпты. Бұл логотип 2016 жылы Трамптың бейресми сайлау алды логотипі болған. Жасаушы компания: Design is Play. Авторлық құқық бойынша енді ашылған компанияға үлкен айыппұл келіп тұрмасын...» дейді желі белсендісі.
Ал, оқырмандардың бір бөлігі бұл жазбаға аң-таң болып отырса, енді бірі күлкіге қарық болуда.
Айта кететін тағы бір жайт, әкімдік тарапы аталған жүйенің іске қосылғаны жайлы жарияға жар салып жарнамалап жатса да, қала тұрғындарының көпшілігі аталмыш электронды төлеу жүйесін автобустардан көрмегендігін айтып шағымдануда.
