Түркістан облысының әкімі Дархан Сатыбалды жеке қабылдау кестесіне сай тұрғындармен кездесті. Тұрғындарды жеке мәселелері бойынша қабылдап, азаматтардың өтініш-тілектерін тыңдады. Ашық пікір алмасу өтіп, күрделі түйткілдердің түйіні тарқатылды.
Жеке қабылдауға келген тұрғындар баспанамен қамту, тұрғын үйге кезекке тұру, жер телімін бөлу, денсаулық сақтау, жұмыспен қамту, автомобиль жолдарын жөндеу және т.б әлеуметтік мәселелерді көтерді, ұсыныстарын жеткізді. Облыс басшысы тарапынан жауапты мамандар мен сала басшыларына нақты тапсырмалар берілді.
Атап айтқанда, Дархан Сатыбалдымен кездескен Сарыағаш ауданының тұрғыны баспана сұрап келді. Мүгедек азамат бірнеше рет аудан әкімінің жеке қабылдауына келіп, тұрғын үй кезегінде тұру мәселесін көтерген. Алайда бұл отбасының екі үйі бары анықталған. Жылжымайтын мүліктерді иеліктен шығарған күннен бастап бес жыл мерзім өткеннен кейін кезекке тұруға қайта өтінім беру мүмкіндігі бары түсіндірілді.
Сарыағаш ауданының тұрғыны Нұржан Артыхов дәрігерлерге алғыс айту үшін келгенін айтты. Сонымен қатар І топ мүгедегі көмекке мұқтаж жандарға қолдау көрсетіп жүрген кей халық қалаулыларына ризашылығын білдірді. Сарыағаштық азамат мүгедектерге арналған пандус мәселесін де көтерді. Тұрғынның өтініші негізінде тексеру жұмыстары басталатын болды.
– Мен ауруханаға түскен сайын дәрігерлердің жанкештілігіне таң қаламын. Екі аяғымнан айрылғанмын, бірнеше ота жасалған. Дәрігерлердің арқасында аман жүрмін. Сол үшін алғыс айтамын. Бүгінде көп жағдайда рахмет айтуды ұмытып жатамыз. Жақсылықты айтуға ұялатын заман болды. Соған жаным ауырады. Жатып ішер жалқауларды көз көріп жүр. Ондайға жай қарап тұра алмаймын. Айтып жүремін. Қоғамда масылдық дендеп, жалқаулық жайлап алмас үшін әрекет керек. Ал әрекетті әдетке айналдыру әркімнің өзінің қолында, – деді Сарыағаш ауданының тұрғыны Нұржан Артыхов.
Қабылдауға келген облыс тұрғыны ауыл шаруашылығы мақсатындағы жерлерді халыққа қайтару мәселесін көтерді. Облыс бойынша жыл басындағы елді мекендердегі жұртшылық шаруашылығындағы шартты мал басына жайылым қажеттілігі 2122,2 мың гектарды құрады. 2023 жылға ортақ жайылым көлемін екі бағыт бойынша 1015,0 мың гектарға ұлғайту жоспары бекітіліп, аудан, қала әкімдіктері тарапынан тиісті жұмыстар жүргізілуде. Жыл қорытындысымен 333,2 мың гектар жер учаскесі ортақ жайылымға қайтарылса, қалған 681,8 мың гектарды елді мекендердегі жайылым жүктемесінен төмендету арқылы қол жеткізу көзделген.
Аудан, қала әкімдіктері тарапынан 201,7 мың га жайылым жер учаскелері мемлекет меншігіне қайтарылды. Сондай-ақ жалпы облыс бойынша жыл басынан бері пайдаланылмай жатқан немесе заңнама талаптарын бұза отырып пайдаланылып отырған 189 349,72 га жер учаскесі қайтарылған. Оның ішінде 5 686,34 га егістік, 183 125,70 га жайылым, 537,59 га басқа мақсаттағы жер учаскелері бар.
Өңір басшысы халықтың өтініштерін мұқият тыңдап, барлық мәселе заң талаптары аясында шешілетінін атап өтті.
– Шын мұқтаж жандарға мемлекет тарапынан қолдау көрсетіледі. Ел Президенті «Халық үніне құлақ асатын мемлекет» тұжырымдамасын жүзеге асыруды тапсырды. Бұл ретте тұрғындардың әрбір өтініші ескерусіз әрі жауапсыз қалмауы тиіс. Барлық мәселе заң шеңберінде қаралып, тиісті сала мамандарының талқылауымен жан-жақты саралана отырып шешіледі. Кейбір сауалдардың шешімін бірден тапсақ, кейбірін іске асыру үшін ұзақ мерзім қажет,– деді облыс әкімі Дархан Сатыбалды.
Аймақ басшысы жеке қабылдауға келген азаматтардың мәселесін сала мамандарымен бірге қарап, заң аясында әрекет ету туралы нақты тапсырмалар берді. Сұрақтар жан-жақты қаралып, заңдылығына қарай шешіледі.
Облыс әкімі бүгінге дейін 100-ге жуық жеке қабылдау өткізіп, 300-ге жуық тұрғынның мәселесін тыңдады. Сондай-ақ аудандарға жұмыс сапары барысында 200-ден астам тұрғынды жеке қабылдады. Облыс әкімінің жеке қабылдауына жазылуды Түркістан облысы әкімі аппаратының өтініштерді қарауды бақылау бөлімі жүргізеді.
Президент Қасым-Жомарт Тоқаев: «Билік пен қоғам арасындағы диалог нығая түсті. «Халық үніне құлақ асатын мемлекет» тұжырымдамасына баса мән беріліп отыр. Бұл ауқымды жұмысты бүкіл қоғамымыз бірлесе атқарды. Дегенмен, осымен тоқтап қалуға болмайды. Бәріміз осы сара жолмен ілгері жүруіміз керек.
Тағы бір аса маңызды реформа – Президенттің бір ғана мерзімге сайлануы. Біздің аймақтағы қай мемлекетті алып қарасаңыз да, мұндай өзгеріс мүлдем болмаған. Сондықтан бұл реформа демократия жолындағы батыл қадам деп сенемін. Тәуекелге бел бусақ та, осындай шешім халқымыздың жарқын болашағы үшін керек деп кәміл сенемін» деп айтып өткен болатын.
Қазақстан Президенті Қасым-Жомарт Тоқаев «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауында мемлекеттік институттардың рөлін нығайту, азаматтардың құқықтары мен бостандықтарын қорғау, халықтың тұрмыс сапасын жақсарту мәселелерін кеңінен сөз етті. Жолдауда қазіргі әлеуметтік-экономикалық жағдайға жан-жақты, терең талдау жасап қана қоймай, оның шешу жолдарын да көрсетіп берді.
Ұлттық құрылыстың қазіргі кезеңінде Қазақстан Республикасы қарқынды саяси өзгерістер кезеңін бастан кешіп жатыр. Саяси модернизацияның тұжырымдамалық фрейміне «Халық үніне құлақ асатын мемлекет» моделі арқау болды. «Listening State» («Құлақ асатын/еститін мемлекет») — бұл үкіметтің азаматтармен өзара әрекеттесу, оларды толғандыратын мәселелер мен қажеттіліктерін түсіну бойынша белсенді күш-жігеріне баса назар аударатын мемлекеттік саясат тұжырымдамасы. Бұл тұжырымдама үкімет пен қоғам арасындағы ашық әрі айқын байланыс арналарын құруды көздеп, шешімдерді әзірлеу және қабылдау процесінде азаматтардың дауысын естуге және ескеруге бағытталған.
«Халық үніне құлақ асатын мемлекет» тәсілі ақпаратты жай ғана тарату немесе «жоғарыдан төменге» саясатын жүзеге асыруға қарағанда, тиімді басқару бұдан да көп нәрсені қажет ететінін көрсетеді. Яғни кері байланыс, идеялар мен қоғамдық пікірді белсенді іздеудің маңызын мойындайды. Бұған қол жеткізуге жәрдемдесетін түрлі құралдар бар: қоғаммен кеңесу, сауалнамалар, жалпы жиналыстар, онлайн форумдар және басқа да қатысу тетіктері.
«Халық үніне құлақ асатын мемлекетте» Үкімет азаматтарға ойларымен, идеяларымен және пікірлерімен алмасу үшін қолжетімді және ыңғайлы платформалар ұсынады. Бұл сандық платформалар және қоғамдық жиналыстар сияқты құралдар арқылы немесе т.б. жүзеге асырылуы мүмкін.
Мемлекеттік органдар мен азаматтар арасындағы өзара іс-қимылдың жаңа форматтарын қолдануды жеке үрдіс деп атауға болады. Мемлекеттік органдар жедел хабар алмасу құралдарын пайдаланады, чат боттарын жасайды. Жергілікті атқарушы органдар өтініштерді қарау мен азаматтарды қабылдауды бір жерде жүргізген жағдайда қызмет көрсету «кедергісіз орта» қағидаттары бойынша «ашық қабылдау» арқылы жұмыс істейді.
ДАРХАН САТЫБАЛДЫ ТҰРҒЫНДАРДЫ ЖЕКЕ МӘСЕЛЕЛЕРІ БОЙЫНША ҚАБЫЛДАДЫ
