18 мамыр - Халықаралық музейлер күніне орай Қожа Ахмет Ясауи кесенесінде "Музей түні" шарасының ресми ашылуы өтті. "Әзірет Сұлтан" Ұлттық тарихи-мәдени музей-қорығының директоры М.Садықбеков мәдени-көпшілік шараны ашып, көпшілік шараның мән-мағынасына тоқталды. "Жас хикметшілер әуезі" тақырыбында хикмет орындаған оқушыларды арнайы алғыс хатпен марапаттады. Р.Сейтметов атындағы сазды-драма театрының әртістерінің қатысуымен "Абылай ханның Ясауи кесенесіне зияраты" тақырыбында тарихи қойылым көпшілікке көрсетілді.
Сонымен қатар, Қожа Ахмет Ясауи кесенесінде "Музей түні" шарасында музей қызметкерлері келген қонақтарға арнап Түркістанда жерленген тарихи тұлғалар кейіпкерлері ретінде арнайы экскурсиялар ұйымдастырды. Атап айтқанда, Абылай хан, Қазыбек би, Бопай ханша, Аманбике ханым (Жәнібек ханның қызы), Қабанбай батыр, Ханым бике, Шорнағат хан, Кәмилә ханым (Шақшақ Жәнібектің анасы), Қарашаш ана (Абылай ханның бәйбішесі). Шара соңында туристер мен қала қонақтарына Көреген Әмір Темір дәуірінен бастау алған "Хәлім ботқа" асы мен бауырсақ үлестірілді. Шараға келген туристер мен қонақтар мәдени- көпшілік шараның қуәсі болып, көтеріңкі көңіл күймен тарқасты.
Осыдан кейін, музей-қорық бірқатар шараларды ұйымдастырды. Алдымен Қылует жерасты мешітінде музей қызметкері Ы.Ғайыпов Қожа Ахмет Ясауиге қатысты аңыз-әфсаналарды таныстырды. Жиналған жұрт бұрын соңды естімеген Қожа Ахмет Ясауиге және оның 99 мың шәкіртіне қатысты мәліметтерді санасына сіңірді. Жиналған жұртшылықта есеп болмады.
Соңдықта, дәстүрлі " Ясауитану 2024" республикалық байқауына Түркістан қаласы мектептерінен қатысқан сайдың тасындай 10 хикметші "Жас хикметшілер әуезі" тақырыбында Құл Қожа Ахмет Ясауидің "Диуани хикметтерін" орындады. Түркістанға алыс-жақыннан келген қонақтар Ясауи бабамыздың хәл хикметі ілімінен сусындап қайтты.
Құмырашы А.Рысбаев пен ағаш ұстасы Г.Күнқожаев шеберлік сағаттарын өткізді.
Б.Байбол - "Әзірет Сұлтан" Ұлттық тарихи-мәдени музей-қорығының бөлім басшысы.
