Қазақстан Республикасы Премьер-министрінің бірінші орынбасары Роман Скляр East Hope Group (ҚХР) бас директоры Мэн Чанцзюнмен кездесу өткізді. Компания Қазақстанда түсті металдардың тігінен кіріктірілген өндірісін құру жөніндегі ірі жобаны іске асыруды жоспарлап отыр, деп хабарлайды No-comment.kz - ҚР Премьер-Министрінің ресми ақпараттық ресурсына сілтеме жасап.
Өнеркәсіптік парктің құрылысын көздейтін жобаға тау-кен байыту комбинаты, электролиз зауыты және электр стансасы кіреді. Инвестициялардың күтіліп отырған көлемі $12 млрд-тан астам. Сондай-ақ жоба 10 мыңға жуық жұмыс орнын ашуды қамтамасыз етеді, бұл өңір экономикасына оң әсер етеді. Жобаның маңызды аспектісі – экспорттық өнімге бағдарлануы. East Hope Group компаниясы көлемі 20 км2 болатын осындай нысанды Қытайда іске асырды, бұл оның ірі инвестициялық жобаларды іске асырудағы тәжірибесін растайды.
Әңгімелесу барысында тараптар Қазақстан мен East Hop Group арасындағы ынтымақтастықты одан әрі дамыту үшін негіз болатын инвестициялар туралы келісімге қол қою мәселелерін талқылады.
Кездесу соңында Роман Скляр бұл жобаны іске асыру Қазақстан мен Қытай арасындағы стратегиялық әріптестікті нығайту жолындағы маңызды қадам болатынына сенім білдірді.
