Оның хабарлауынша, барлық жүктің 80%-ы теміржол арқылы, ал 20%-ы автокөлікпен тасымалданды.
«2030 жылға дейінгі көлік-логистика әлеуетін дамыту тұжырымдамасы аясында инфрақұрылымды дамыту бойынша нақты шаралар іске асырылып жатыр. Қазір екі негізгі транзиттік дәлізге басымдық берілуде. Біріншісі, Транскаспий халықаралық көлік маршруты. Бұл бағыт Қытайдың «Бір белдеу – бір жол» бастамасымен және Ұлы Жібек жолының қайта жандануымен тығыз байланысты. Өткізу қабілеті 6 млн тоннаны құрады. Қазақстан мен Қытай арасындағы келісімдер аясында 2030 жылға дейін ТМТМ арқылы 2 мың контейнер тасымалдау жоспарланған», – деді спикер.
Жалпы, 2024 жылы ТМТМ арқылы 4.5 млн тонна жүк тасымалданды.
Екінші бағыт – «Солтүстік – Оңтүстік» дәлізінің шығыс бағыты. Оның өткізу қабілеті 6 млн тоннаны құрайды. 2024 жылғы шілдеде Қазақстан Ресей, Түрікменстан және Иранмен бірлесіп, 2024-2025 жылдарға арналған Жол картасына қол қойды. Осы бағытты дамыту үшін арнайы Жұмыс тобы құрылды. Қазақстан аумағы бойынша қосымша жүк ағындарын тарту мақсатында транзиттік жүктерге 50% мөлшерінде жеңілдік беріледі.
2030 жылға қарай Қазақстан транзиттік тасымалдау көлемін 2 еседен астам ұлғайтып, 74 млн тоннаға жеткізбек.
