Шымкентте жергілікті өндірушілерді ірі өнеркәсіптік компаниялардың жеткізу тізбегіне қосу бағытындағы жұмыс жалғасуда. Бұл жолы қала кәсіпкерлері «Қарашығанақ Петролеум Оперейтинг Б.В.» компаниясының өкілдерімен тікелей кездесіп, өнім жеткізу талаптары мен ынтымақтастық мүмкіндіктерін талқылады.
ҚПО бас директорының орынбасары Мұхтар Манкеев бастаған делегация Шымкентке жұмыс сапарымен келіп, жергілікті кәсіпорындардың өндірістік әлеуетімен танысты. Сапардың негізгі бағыттарының бірі – мұнай-газ саласында пайдаланылатын тауарлар бойынша импортты алмастыру мүмкіндіктерін қарастыру және қазақстандық өндірушілермен іскерлік байланыстарды кеңейту.
Делегация өкілдері алдымен қаладағы бірқатар ірі өндіріс орындарын аралады. Мұндай формат әлеуетті тапсырыс берушіге кәсіпорынның мүмкіндігін тек таныстырылым арқылы емес, өндіріс процесі, технологиялық база және шығарылатын өнім арқылы бағалауға мүмкіндік береді.
Кейін «Қызғалдақ» сарайында Шымкент кәсіпорындарының өнімдері ұсынылған көрме ұйымдастырылды. Ал ҚПО өкілдерімен өткен кездесуге қала әкімінің бірінші орынбасары Айдан Кәрімов және 70-ке жуық жергілікті кәсіпорын өкілі қатысты.
Кәсіпкерлер үшін кездесудің практикалық маңызы жоғары болды. Жергілікті бизнес өкілдерін ҚПО-мен серіктестік орнату жолдары, компанияға өнім жеткізу мүмкіндігі және тауарларға қойылатын талаптар қызықтырды. Делегация өкілдері кәсіпкерлердің сұрақтарына жауап беріп, өзара пікір алмасты.
Ірі тапсырыс берушімен осындай тікелей диалог өндірушілерге нарық талаптарын нақты түсінуге мүмкіндік береді. Кәсіпорын қандай техникалық және сапалық талаптарға сәйкес келуі керектігін білген жағдайда өндірісті сол сұранысқа бейімдеп, бәсекеге қабілеттілігін арттыра алады.
Шымкент үшін бұл бағыттың маңызы импортты алмастырумен де байланысты. Қала кәсіпорындарының мұнай-газ саласына қажетті тауарларды өндіру мүмкіндігін кеңейту сырттан жеткізілетін өнімдердің бір бөлігін отандық өндіріс есебінен алмастыруға жағдай жасайды.
ҚПО делегациясының сапары осы тұрғыдан жергілікті кәсіпкерлер үшін өз өнімдерін таныстыратын ғана емес, ірі өнеркәсіптік тапсырыстарға қойылатын талаптарды түсініп, жаңа өткізу нарығына шығу мүмкіндігін қарастыратын практикалық алаң болды.
