Шымкентте кәсіпкерлік пен туризм саласының өзара байланысын күшейтуге бағытталған жаңа мүмкіндіктер қалыптасуда. Соның бірі – Қазақстанда жүзеге асырылып жатқан Tax Free пилоттық жобасы. Жүйе шетелдік туристердің ел аумағында сауда жасауына қолайлы жағдай қалыптастыруға және туристік-сервистік инфрақұрылымның тартымдылығын арттыруға бағытталған.
Осыған байланысты Шымкент қаласындағы кәсіпкерлік субъектілеріне Tax Free жүйесіне қатысу мүмкіндігін қарастыру ұсынылуда. Жобаға сауда орталықтары, сауда желілері, дүкендер, отандық және халықаралық брендтер, франчайзинг нысандары және шетелдік туристерге қызмет көрсететін басқа да кәсіпорындар қызығушылық таныта алады.
Tax Free жүйесінің кәсіпкерлер үшін маңызы шетелдік қонақтардың сатып алу белсенділігін ынталандыру мүмкіндігімен байланысты. Турист үшін сауда жасау шарттары неғұрлым ыңғайлы болған сайын, жергілікті тауарлар мен қызметтерге деген қызығушылықты арттыруға мүмкіндік қалыптасады. Бұл сауда кәсіпорындары үшін қосымша тұтынушылар аудиториясына шығудың бір жолы бола алады.
Жобаның туристік сала үшін де маңызы бар. Қонақүйлер, туроператорлар мен турагенттер шетелдік қонақтарға Tax Free мүмкіндіктері туралы ақпарат бере отырып, қаладағы сауда нысандары мен туристік сервистер арасындағы байланысты күшейте алады. Нәтижесінде туристің Шымкентте өткізетін уақыты тек көрікті орындарды аралаумен шектелмей, сауда және қызмет көрсету секторымен де ұштасады.
Бұл отандық өндірушілер үшін де қосымша мүмкіндік қалыптастырады. Шетелдік туристерге жергілікті жерде өндірілген тауарларды ұсыну қазақстандық өнімді танытуға және жаңа тұтынушылар аудиториясын қалыптастыруға ықпал етуі мүмкін.
Жүйенің тиімді жұмыс істеуі үшін кәсіпкерлердің оның талаптары мен қатысу тәртібін дұрыс түсінуі маңызды. Осы мақсатта сауда, туризм және қызмет көрсету саласындағы ұйымдарды ақпараттық-түсіндіру жұмыстарына белсенді қатысуға шақыру қарастырылған. Tax Free жүйесіне қосылу тәртібі туралы қажетті ақпарат QR-кодтар арқылы қолжетімді.
Шымкент үшін Tax Free тек туристерге арналған қосымша сервис емес, сауда мен туризм арасындағы экономикалық байланысты кеңейтудің бір құралы бола алады. Қаладағы кәсіпкерлердің жүйеге қатысуы шетелдік туристерге көрсетілетін қызмет сапасын арттырып, жергілікті сауда айналымын дамытуға және Шымкенттің туристік әрі іскерлік тартымдылығын күшейтуге мүмкіндік береді.
Taxfree.kz ресми сайты
