Қазақ халқы көшпелі ел болғандықтан күнделікті тіршілікте қолданылатын бұйымның берік әрі көшіп-қону кезінде қолайлы болуына ерекше көңіл бөлген. Осы тұрғыда көшпенділер мәдениетіне байланысты қалыптасқан тұрмыстық бұйымдардың бірі – кесеқап. Шеберлер бұл бұйымды көші-қон барысында шыны, қыш кеселерді сындырмай алып жүру үшін ағаштан, киізден, шиден, тері мен былғарыдан жасаған.
«Әзірет Сұлтан» музей-қорығының қорында КК 234 номерімен тіркелген кесеқап бар. Бұл жәдігер ХІХ-ХХ ғғ. мерзімделеді. Кесеқап цилиндр пішінінде ағаштан жасалған. Бұйымның жоғарғы жағына созылып түскен ромб тәрізді өрнек жүргізіліп, ортасы «қошқар мүйіз» ою-өрнегімен безендірілген. Кесеқап ұстауға ыңғайлы болу үшін жоғарғы жағына теріден шегемен ұстатылған тұтқа қондырылған. Ұзындығы 24 см, ал диаметрі 16 см құрайды. Мұндай кесеқапқа бір-біріне кигізіп, бірнеше кесе салып қоюға болады.
Осындай кесеқап көші-қон кезінде ыдыс-аяқты тасымалдау және сақтау үшін өте ыңғайлы болған.
Гүлмира Атабаева - "Әзірет сұлтан" музей-қорығының экскурсоводы.
