Орталық референдум комиссиясының Төрағасы Нұрлан Әбдіровтің инспекциялық сапарлар барысында барған келесі өңірі Батыс Қазақстан облысы болды. Ол аймақтың 6 қазанға белгіленген алдағы республикалық референдумға дайындығын тексерді, деп хабарлайды No-comment.kz - Қазақстан Республикасының Орталық Сайлау комиссиясына сілтеме жасап.
Сапар аясында ОРК Төрағасы бірқатар учаскелерде болып, дауыс беруге дайындық барысымен танысты. Оларды жабдықтау және дауыс берушілер үшін қолайлы жағдай жасау мәселелеріне ерекше назар аударылды. Сапарға ОРК мүшесі Шавхат Өтемісов пен аппараттың жауапты қызметкерлері қатысты.
Аумақтық референдум комиссиялары төрағаларының, жергілікті атқарушы және құқық қорғау органдары өкілдерінің қатысуымен өткен семинар-кеңесте өңірде азаматтардың тізімін нақтылау, референдумды материалдық-техникалық қамтамасыз ету, сайлау кезеңінде заңдылық пен құқықтық тәртіпті сақтау бойынша жұмыстар туралы баяндамалар тыңдалды, алдағы науқанның негізгі ерекшеліктері талқыланды.
Өңір бойынша 505 учаскелік комиссия жұмыс істейді, олардың құрамында 3 220 адам бар. Батыс Қазақстан облысында барлығы 449 251 сайлаушы тіркелген, оның 19 мыңнан астамы мүгедектігі бар адамдар. Олар үшін дауыс беруге барлық жағдайлар жасалады, тұрғындарды әлеуметтік желілер, мессенджерлер арқылы ақпараттандыру ұйымдастырылады, арнайы онлайн-сервистер іске қосылады. 13 call-орталық ашылады, 109 қызметі де болады.
Кездесу барысында Нұрлан Әбдіров республикалық референдум туралы заңнамадағы жаңалықтарды және осы науқанның ерекшеліктерін түсіндірді, сондай-ақ комиссиялардың барлық мүшелерін үздіксіз және сапалы оқыту қажеттілігіне назар аударды.
ОРК Төрағасы көктемгі су тасқыны кезінде су басу аймағында қалған референдум учаскелерінің жағдайына ерекше назар аударды. Осы мақсатта ол Теректі ауданының Подстепное ауылына барды, онда №384 учаске су тасқынынан зардап шекті. Қазіргі уақытта мұнда барлық қалпына келтіру жұмыстары аяқталды және референдум өткізуге үй-жай толығымен дайын.
Электоралды оқыту үдерісіне мониторинг жүргізу мақсатында ОРК басшысы Орал қаласының учаскелік комиссияларының төрағаларына арналған тренингке қатысып, сөз сөйледі. «Дауыс беру күні» тренингінің мақсаты – референдум күні жүзеге асырылатын барлық рәсімдерді сапалы меңгеру, азаматтар тізімімен, есептен шығару куәліктерімен, азаматтардың ауызша және жазбаша өтініштерімен жұмыс істеудің практикалық дағдыларын қолдану, қоғамдық бірлестіктер өкілдерімен қарым-қатынас жасау. Байқаушылар мен бұқаралық ақпарат құралдары үшін қажетті жағдай жасаудың маңыздылығы атап өтілді. Комиссия мүшелерінің назарын сайлау процесіне қатысушылардың барлығы дауыс берген күні референдум учаскелерінде Тәртіп ережелерін міндетті түрде сақтауға аударды.
Қазақстанның инновациялық және телекоммуникациялық жүйелер университетінде өткен референдум туралы заңнаманы білуге Орал қаласының студенттік командаларының квиз-тренингі қызықты болды. Турнир жастар тарапынан үлкен қызығушылық тудырып, референдумды ұйымдастыру мен өткізудің құқықтық аспектілері бойынша олардың хабардарлығын көрсетті.
«Алдағы референдум Тәуелсіз Қазақстан тарихындағы төртінші референдум болып табылады. Өздеріңіз білетіндей, бірінші және екінші референдум 1995 жылы, ал үшінші референдум 2022 жылдың 5 маусымында өтті. Бұл плебисциттерге жастар әрқашан белсенді қатысқаны қуантады. Бұл - олардың ел тағдырына деген қызығушылығын және оның болашағына әсер ету ниетін көрсетеді. Жастар - бұл біздің болашағымыз ғана емес, қазіргі заманның белсенді күші. Сіздердің ұстанымыңыз, энергияңыз және өзгеруге деген ұмтылысыңыз құрметке лайық. Жастардың референдумға қатысуы тек дауыс беру ғана емес, бұл азаматтық жауапкершіліктің көрінісі және өздері мен болашақ ұрпақ үшін өмірді жақсартуға деген ұмтылыс. «Қолдаймын» немесе «қарсы» – бұл әрқайсыңыздың пікіріңіз, алайда референдумда әркімнің дауыс беру міндеті», - деді Нұрлан Әбдіров турнир қатысушыларына сөйлеген сөзінде.
Қалыптасқан дәстүр бойынша Тасқала ауданының Тасқала кентінде ОРК басшысы Ақжайық, Тасқала, Теректі және Бәйтерек аудандарының жастар өкілдерімен кездесті. Жастар кездесудің мазмұнды әңгімесіне белсенді қатысты.
Кездесу барысында ОРК Төрағасы жастарға 2022 жылғы конституциялық реформа контексіндегі елдің жаңартылған сайлау жүйесінің ерекшеліктері, республикалық референдум туралы заңнамадағы жаңалықтар, сайлау саласындағы өзекті трендтер мен халықаралық тәжірибе туралы айтып, басқа елдердегі сайлауды халықаралық байқауға қатысудан алған әсерлерімен бөлісті. Жастар өз кезегінде сайлау процесіне жаңа ақпараттық технологияларды енгізу, онлайн режимінде дауыс беру, байқаушылардың жастар топтарын құру, әкім болу үшін кандидаттарға қойылатын талаптар туралы және т.б. мәселелерге қызығушылық танытты.
Соңында жастар электоралдық саланың өзекті мәселелері бойынша дәстүрлі онлайн-сауалнамаға белсенді қатысты.
Өңірдегі барлық кездесулерінде ОРК басшысы заңнаманы қатаң сақтау, жасырын дауыс беруді, сайлау процесінің барлық кезеңдерінің жариялылығы мен ашықтықтығын қамтамасыз ету қажеттілігіне ерекше назар аударғанын атап өткен жөн.
