Оның айтуынша, Қарағандыда жылу қуаты тапшылығы мәселесі үшінші жылу шығарғышты салу арқылы шешілді. Бұл облыстағы соңғы 30 жылдағы ТКШ-дағы ең ірі жоба. Қазан айында жылу магистралі іске қосылды. Алдағы жеті жылда үшінші жылу шығарғыш 1,2 млн шаршы метр тұрғын үйді, яғни 20 мыңнан астам жаңа пәтерді жылумен қамтамасыз етеді.
«Саран қаласында Орталық қазандықты аяқтадық. Өздеріңіз білетіндей, іске қосу жұмыстары кезінде жылу беру сәтсіз аяқталды, осыған байланысты резервтік ресурстар тартылды. Қазір тұрғындардың үйлеріне жылу орталық және резервтік жергілікті қазандықтардан беріледі. Жаңа қазандықта бірінші және екінші қазандықтар жұмыс істейді. Үшінші және төртінші қазандық бойынша іске қосу-жөндеу жұмыстары жүргізілуде. Жылу орталығының іске қосылуы қаланың тұрғын алабымен қатар, Saran индустриялық аймағын және РТБ шағын ауданын жылумен қамтамасыз етуге мүмкіндік беретінін атап өтемін», – деп толықтырды спикер.
Биыл 14 ауылдың 1,5 мың тұрғыны сапалы ауыз сумен қамтамасыз етіледі. 20 шағын ауылда блок-модульдер орнатылуда. Бұл шаралар облыс халқының 97,6%-на дейін сумен қамтуды арттырады. Жеке секторды газдандыру жұмыстары жалғасуда. Газ желілері 7621 үйге тартылды, оның 3573-і газға қосылған.
«Тұрғын үй құрылысына қатысты – 9 айда жоғары қарқынмен 380 мың шаршы метр тұрғын үй пайдалануға берілді. Жыл соңына дейін барлығы 500 мың шаршы метр салынады. Жалпы, мыңдаған отбасын, оның ішінде халықтың әлеуметтік осал топтарын тұрғын үймен қамтамасыз етеміз. Мемлекеттік қолдау шараларын пайдалана отырып, ауылдарда құрылысты белсенді жүргізетін бизнестің рөлін ерекше атап өткім келеді. 55 мың шаршы метр немесе 755 пәтер салынды», – деді өңір басшысы.
