Жоғары оқу орнынан кейінгі әскери білім Астана қаласындағы Ұлттық қорғаныс университетінде ұсынылған. Университет Қарулы Күштер, басқа да әскерлер мен әскери құрылымдар үшін мамандар даярлауды жүзеге асырады, сондай-ақ жыл сайын 1000-нан астам адамның, оның ішінде басқа мемлекеттік органдардың басшы құрамының біліктілігін арттыруды жүргізеді. Сондай-ақ Қорғаныс министрлігі елдің екі қаласында екі жаңа әскери колледж құру туралы жариялады. Бұл туралы ОКҚ-да өткен баспасөз мәслихатында ҚР ҚМ әскери білім және ғылым департаментінің бастығы, полковник Мұрат Олжабаев мәлімдеді, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
«Жоғары білімді Қарулы Күштердің барлық дерлік түрінің негізгі мамандықтарын қамтитын үш әскери институт ұсынады. Алматы қаласындағы Сағадат Нұрмағамбетов атындағы Құрлық әскерлерінің Әскери институты, Ақтөбедегі Талғат Бигелдинов атындағы Әуе қорғаныс күштерінің Әскери институты және Алматыдағы Радиоэлектроника және байланыс Әскери-инженерлік институты. Әскери институттарда оқу мерзімі 4 жылды құрайды», - деді Мұрат Олжабаев.
Оқу кезеңінде курсанттар тегін тұрумен және олардың ішінде ақшалай, азық-түлік, киім-кешек, медициналық жабдықтармен қамтамасыз етіледі.
«Әскери институттардың түлектеріне «бакалавр» дәрежесі беріле отырып, жоғары білім туралы мемлекеттік үлгідегі диплом беріледі, «лейтенант» әскери атағы беріледі, содан кейін олар Қарулы Күштерде, сондай - ақ басқа да әскерлермен әскери құрылымдарда одан әрі әскери қызмет өткеру үшін жіберіледі», - деді ол.
Сонымен қатар Астана, Щучинск және Шымкент қалаларындағы үш әскери колледж техникалық және кәсіптік білім береді. Колледждерде мотоатқыштар, танк, артиллерия және инженерлік бөлімшелер, байланыс және РХБҚ әскерлері, қару-жарақ пен әскери техниканы пайдалану және жөндеу бөлімшелері үшін кәсіби сержанттар дайындалады.
Бұдан бөлек, Қорғаныс министрлігі тағы екі әскери колледж - Бауыржан Момышұлы атындағы әскери-спорт колледжін және Алматы мен Қарағандыдағы «Жасұлан» республикалық мектептерінің базасында Талғат Бигелдинов атындағы Әскери колледжін ашу бойынша жұмыс жүргізуде.
Осы оқу орындарына алғашқы кадет қабылдау биылғы жылы өтеді. 9-сынып түлектері конкурстық негізде түсе алады. Болашақ әскери қызметшілерді даярлайтын мамандықтар:
- Бауыржан Момышұлы атындағы әскери-спорт колледжі (Алматыда):
- Дене шынықтыру және спорт нұсқаушысы
- Барлау және десанттық-шабуылдау бөлімшелерін басқару
- Талғат Бигелдинов атындағы әскери колледж (Қарағанды қ.):
- Зымыран әскерлері мен артиллерия бөлімшелерін басқару;
- Заттай қамтамасыз ету;
-Азық-түлікпен қамтамасыз ету.
