Astana IT University қабырғасында 9–12 сынып оқушылары арасында жасанды интеллект бойынша алғашқы республикалық олимпиаданың — AI Olymp финалы өтті. Олимпиадаға еліміздің барлық өңірлерінен алдын ала іріктеуден өткен 40 үздік оқушы қатысты, деп хабарлайды No-comment.kz - ҚР Цифрлық даму, инновациялар және аэроғарыш өнеркәсібі министрлігіне сілтеме жасап.
Олимпиаданы Қазақстанның спорттық бағдарламалау федерациясы мен DSML.KZ — деректерді талдау және машиналық оқыту мамандары қауымдастығының бастамасымен, Цифрлық даму, инновациялар және аэроғарыш өнеркәсібі министрлігінің қолдауымен ұйымдастырды. Бас әріптес ретінде Орталық Азиядағы ең ірі технопарк — Astana Hub қолдау көрсетті. Astana Hub ЖИ технологияларын белсенді түрде ілгерілетіп, Қазақстанда және одан тыс жерлерде технологиялар мен инновацияларды дамытуға бағытталған жобаларды жүзеге асыруда.
AI Olymp — мектеп оқушылары арасында ЖИ технологияларына қызығушылықты дамытуға бағытталған елдегі алғашқы ауқымды іс-шара. Бұл олимпиада мемлекеттік құрылымдар мен сарапшылар қауымдастығы арасындағы стратегиялық әріптестіктің нәтижесі ретінде өткізілді.
«AI Olymp — бұл жасанды интеллект саласындағы қазақстандық таланттардың жаңа буынын қалыптастыруға жасалған үлкен қадам. Бүгін біз оқушылардың ЖИ-ға деген белсенді қызығушылығын көріп отырмыз. Біздің міндетіміз — осы қызығушылықты қолдау, мүмкіндіктер беру және олардың өз әлеуетін ашып, болашақта еліміздің технологиялық трансформациясында көшбасшы болуына жағдай жасау», — деді Цифрлық даму, инновациялар және аэроғарыш өнеркәсібі министрі Жаслан Мәдиев.
AI Olymp екі күнге созылып, екі бес сағаттық сайыс турын қамтыды. Жарыстардан бөлек, қатысушылар ЖИ саласындағы сарапшылардың дәрістерін тыңдап, Қазақстанда бұл бағытты дамыту жоспарларымен танысты.
Оқушылардың қызығушылығын арттырып, ынталандыру мақсатында қатысушылардың 50%-ы медальдармен және бағалы сыйлықтармен марапатталды. Бұл тәжірибе жастардың ЖИ мен бағдарламалауға деген қызығушылығын нығайтуға бағытталған.
Финал қорытындысы бойынша ең үздік 12 қатысушы оқу-жаттығу жиындарына шақырылады. Осы жиындардан кейін 2025 жылғы тамыз айында Бейжіңде өтетін ЖИ бойынша Халықаралық олимпиадаға (IOAI) қатысатын Қазақстан ұлттық құрамасы құрылатын болады.
«AI Olymp — бұл бір реттік іс-шара емес, жас таланттармен жүйелі жұмыстың бастамасы. Бұл — Қазақстанның цифрлық экономикасының болашақ сәулетшілері. Олар “жасанды интеллект деген не?” деп сұрамайды. Олар оны қалай жақсартуға болатынын ойлап отыр», — деді Спорттық бағдарламалау федерациясының президенті Бағдат Мусин.
Жабылу салтанатына министр Жаслан Мәдиев және федерация президенті Бағдат Мусин қатысты. Олар жас ЖИ-мамандарды даярлау маңыздылығын атап өтіп, Қазақстанның халықаралық аренада лайықты таныстырылатынына сенім білдірді.
Қосымша ақпарат алу үшін бізге хабарласуыңызды сұраймыз:
Толкын Наурызбаева
+77011757075
