Қостанай облысы әлеуметтік-экономикалық дамудың негізгі бағыттары бойынша оң серпінді көрсетуде. Халық саны көбейіп келеді, өнеркәсіп пен ауыл шаруашылығының дамуы жалғасуда, шағын және орта бизнес жанданды. Өңірге инвестициялар өсуде, білім беру, денсаулық сақтау және әлеуметтік саладағы жағдайларды жақсарту жөнінде шаралар қабылданып жатыр, деп хабарлайды No-comment.kz - ҚР Премьер-Министрінің ресми ақпараттық ресурсына сілтеме жасап.
Өнеркәсіп
Қостанай облысы – Қазақстанның негізгі өнеркәсіпті өңірлерінің бірі. Аймақ экономикасының негізін өңдеу өнеркәсібі құрайды, оған облыстағы барлық өндірілетін өнеркәсіп өнімінің 66%-дан астамы тиесілі. Бұл үлестің жартысынан көбін машина жасау алады (54%). Сонымен қатар тамақ өнеркәсібі (22%) мен металлургия (18%) маңызды.
Бүкіл өнеркәсіп саласының үштен бірін (29,2%) құрайтын тау-кен өнеркәсібі де аймақ экономикасына айтарлықтай әсер етуде. 2025 жылдың бірінші тоқсанында өндірістің жалпы көлемі 727,9 млрд теңгеге жетті. Бұл ретте тау-кен өндіру саласындағы өндіріс көлемі өткен жылдың сәйкес кезеңімен салыстырғанда 5,6%-ға өсті. Пайдалы қазбаларды өндіру және өңдеу саласындағы өсім ерекше байқалуда: құрамында алтыны бар кенді өндіру 13,9%-ға, темір кені концентратын өндіру 17,7%-ға, түйіршіктерді өндіру 5,7%-ға, мыс концентратын өндіру 25%-ға және асбест өндіру 23,3%-ға артты.
Темір кені шикізаты Соколов, Сарыбай, Қоржынкөл және Қашар кен орындарында шоғырланған. Сонымен қатар облыс аумағында әлемдегі ең ірі кен орындарының бірі саналатын Жітіқара хризотил-асбест кен орны орналасқан.
Ауыл шаруашылығы
2025 жылдың 1 тоқсанында ауыл шаруашылығы өнімінің жалпы шығарылымы 34,6 млрд теңгені құрады, бұл өткен жылмен салыстырғанда 2,4%-ға артық. Осы уақыт ішінде 17,6 мың тонна ет, 42,5 мың тонна сиыр сүті және 86,8 млн тауық жұмыртқасы өндірілді.
Биыл 5,1 млн гектарға егістік егу жоспарлануда, оның ішінде дәнді дақылдар – 4,2 млн гектар, майлы дақылдар – 755 мың гектар. Негізгі міндеттердің бірі – минералды тыңайтқыштарды қолдануды арттыру. Өткен жылы топыраққа 259,1 мың тонна тыңайтқыш енгізілді, осы жылға 337,6 мың тонна жоспарланған.
Көктемгі егіс алқаптарын қаржыландыру үшін облыстың Аграрлық несие корпорациясы арқылы облыстың жеңілдетілген несиелеу бағдарламалары бойынша 84,1 млрд теңге («Кең Дала», «Кең Дала 2»), Азық-түлік корпорациясы бойынша – 7,3 млрд теңге (форвардтық сатып алу) бөлінді.
Бұдан басқа, 2025 жылдың 1 тоқсанында өңірдегі қайта өңдеу кәсіпорындары 104,9 млрд теңге сомасына өнім өндірді (өткен жылдың сәйкес кезеңімен салыстырғанда 19,4%-ға өсті).
Шағын және орта бизнес
Қостанай облысындағы шағын және орта бизнес саласы оң серпін көрсетуде. 2025 жылғы 1 сәуірдегі жағдай бойынша облыста 66,9 мың кәсіпкерлік субъектісі тіркелген. Мемлекеттік бағдарламалар аясында 2025 жылы кәсіпкерлерді қолдауға 8,6 млрд теңге бөлінгенін атап өту маңызды. Аталған соманың 4,3 млрд теңгесі республикалық бюджеттен, 4,2 млрд теңге облыстық бюджеттен түсті.
Инвестициялар және құрылыс
Облыстың негізгі капиталына инвестициялар көлемі 2025 жылдың бірінші тоқсанында 122 млрд теңгені құрады, бұл өткен жылдың сәйкес кезеңімен салыстырғанда 13,2%-ға артық. Инвестициялардың құрылымы келесідей:
-
өнеркәсіп – 51,1%,
-
көлік және қоймалау – 15,7%,
-
жылжымайтын мүлік – 14,4%,
-
білім беру – 7,5%,
-
ауыл шаруашылығы – 4,6%.
Құрылыс саласында да оң динамика байқалады. 2025 жылдың бірінші тоқсанында аяқталған құрылыс жұмыстарының көлемі 46,3 млрд теңгені құрады, ол 2024 жылдың сәйкес кезеңімен салыстырғанда 66,5%-ға артық. 120,4 мың шаршы метр тұрғын үй пайдалануға берілді, бұл 2024 жылдың осы кезеңімен салыстырғанда 2,3%-ға көп.
2025 жылы ауқымды тұрғын үй жобаларын жүзеге асыруды жалғастыру жоспарлануда, бұл халықты қолжетімді тұрғын үймен қамтамасыз етуге және жаңа жұмыс орындарын ашуға оң әсерін тигізеді.
Әлеуметтік сала
Әлеуметтік сала Қостанай облысы үшін басым бағыт болып қала береді. 2025 жылы 4,4 мың оқушыға арналған 7 мектептің құрылысы жоспарланған, оның 2-еуі 1200 орындық «Жайлы мектеп» ұлттық жобасы аясында салынады (Рудный қаласында 900 орындық, Әулиекөл ауданы Құсмұрын кентінде 300 орындық).
Екі жыл ішінде (2024-2025 жылдары) «Жайлы мектеп» ұлттық жобасы аясында жалпы сомасы 18,7 млрд теңгеге 3 300 орындық 4 мектеп ашылып, жұмыс істеуде (Қостанай қаласы «Береке» шағын ауданында 1200 орындық, «Әуежай» шағын ауданында 900 орындық, Қостанай ауданы Заречное кентінде 900 орындық, Арқалық қаласында 300 орындық).
Медициналық мекемелерді жаңғырту және халықтың медициналық қызметтерге қол жеткізуін арттыру маңызды міндет болып саналады. 2024 жылы 21 нысанның құрылысы аяқталды (3 дәрігерлік амбулатория, 1 медициналық пункт, 17 ФАП). 2025 жылы 7 нысанға күрделі жөндеу жүргізуге 2,2 млрд теңге қарастырылған.
Тұрғын үй-коммуналдық шаруашылық
Қалаларда орталықтандырылған сумен жабдықтауға қол жеткізу 99,0%-ды құрайды, ауылдық жерлерде – 91,3%. Тұрғын үй-коммуналдық шаруашылықты дамытудың 2023-2029 жылдарға арналған тұжырымдамасы шеңберінде 2025 жылы сумен жабдықтау және су бұру құрылысы мен реконструкциялау жөніндегі 66 жобаны іске асыруға 22,1 млрд теңге бөлінді. Жобаларды іске асыру халықтың тұрмыс сапасын жақсартуға, коммуналдық қызметтердің қолжетімділігін қамтамасыз етуге және инфрақұрылымды жаңғыртуға бағытталған.
