Мемлекеттік қолдаудың нақты нәтижесі ретінде қазақстандық жас орындаушылардың халықаралық деңгейдегі жетістіктерін ерекше атап өтуге болады.
«Sadraddin және Рухия Байдүкенова 2025 жылдың 7 шілдесінде Қытайдың Циндао қаласында өткен Өнер және жастар әні фестивалінде Қазақстан атынан өнер көрсетті. Олар ШЫҰ мүше елдер арасындағы мәдени байланысты нығайтуға үлес қосты. Әйгерім Алтынбек 25 маусымда Астанада Хосе Каррероспен дуэт орындады. 27-28 маусымда Италияның Неаполь қаласында Андреа Бочеллимен бірге өнер көрсетті. Әлемнің 400-ден астам үміткері арасынан іріктеліп, Ла-скала театры академиясында тағылымдамасына қабылданды. Мария Мудряк 15, 17, 19 шілдеде Бейжіңде Ұлттық өнер орталығында, 8-10 тамызда Сиань опера театрында Фигароның үйлену тойы операсында графиня рөлін орындайды. Бұл Қазақстан опера мектебінің кәсіби деңгейінің және халықаралық сұранысының айғағы деп білеміз», – деді спикер.
Соңғы жылдары елімізде халықаралық деңгейде мәдени шаралар көбейіп келеді. Азамат Белқайыровтың пайымдауынша, әлемге әйгілі Backstreet boys тобының Қазақстанға алғаш келуі – соның жарқын мысалы. Бұл – еліміздің мәдени өміріндегі маңызды оқиға. Сондай-ақ мәдени туризм мен креативті индустрияны дамытуға серпін беретін жоба. Осындай ірі жобалар еліміздің халықаралық беделін арттырып, заманауи құндылықтарды қолдайтын мемлекет ретінде танылуына ықпал етеді. Оқиғалық туризмді дамыту – ел брендін және ұлттық мәдени мұраны танымал етудің тиімді жолы. Мұндай іс-шараларға мәдениет, бизнес, волонтерлар және жанкүйерлер қатарындағы жастар тартылады. Бұл еліміздің мәдени капиталын күшейтіп, халықаралық имиджін жақсартуға оң әсерін тигізеді.
Аталмыш концерт толықтай жекеменшік инвестициялар есебінен ұйымдастырылуда. Жобаны жеке ұйымдастырушылар жүзеге асырады. Мемлекеттік бюджеттен қаражат бөлінбеген. Алайда Мәдениет және ақпарат министрлігі өз тарапынан ұйымдастырушылық және ақпараттық қолдау көрсетуде.
«Атап айтқанда, мәдени жобаларды үйлестіру, ақпараттық сүйемелдеу және мемлекеттік жергілікті атқарушы органдармен өзара жұмыс қамтамасыз етіліп жатыр. Бұл – мемлекет пен бизнестің тиімді ынтымақтастығының нақты үлгісі. Бұл концерт жай ғана шоу емес, бұл – еліміздің жаңа мәдени келбетін қалыптастыруға бағытталған маңызды қадам. Біз мұндай бастамаларды қолдай отырып, Қазақстанды мәдени және туристік бағыт ретінде әлемге таныта береміз. Бұл министрлік жүзеге асырып отырған ауқымды жұмыстарының бір бағыты ғана», – деп түйіндеді ведомство өкілі.
