Сыр бойындағы Жанкент қалашығы - Қазалы ауданында орналасқан, еліміздің тарихи жадысындағы ерекше орны бар ортағасырлық қала. VII–XII ғасырлар аралығында гүлденген бұл қала көне Оғыз қағанатының астанасы болған. Бүгінде Жанкент - археология мен тарихты ұштастыратын ірі ғылыми-зерттеу алаңына айналды.
2014 жылдан бастап отандық және шетелдік археологтар қалашықта жүйелі қазба жұмыстарын жүргізіп келеді. Табылған мыңдаған жәдігерлер ортағасырлық сауда, мәдениет, діни наным-сенімдердің ерекшелігін зерттеуге зор мүмкіндік беріп отыр. Бұл археологиялық байлықтар облыстық музей қорын да айтарлықтай толықтырды. Археология ғылымындағы осындай жаңалықтар жас ұрпақтың тарихи санасын қалыптастыруда маңызды рөл атқарады.
Жанкентпен қатар, Сығанақ, Бәбіш мола, Жетіасар сынды тарихи орындар ЮНЕСКО тізіміне енгізілуге ұсынылған. Осы бағытта Мәдениет және ақпарат министрлігі жұмыс жүргізіп жатыр. Сонымен қатар, QR-кодтар арқылы 194 тарихи ескерткішке онлайн ақпараттық қолжетімділік қамтамасыз етілді.
Сыр өңіріндегі осындай нысандар - ұлт тарихының ажырамас бөлшегі ғана емес, ішкі туризм мен мәдени танымдық сапарлардың басты бағытына айналып келеді.
