Қызылорда қаласындағы демалыс паркінде алғаш рет ұйымдастырылған «Спорт фестиваль – 2025» шарасы өңірдің спорт сүйер жұртшылығы үшін ерекше күнге айналды. Облыстық дене шынықтыру, спорт және туризм басқармасының бастамасымен өткен бұл мерекелік іс-шара салауатты өмір салтын насихаттауға және жастардың спортқа деген қызығушылығын арттыруға бағытталды.
Фестиваль аясында дзюдо, таеквондо, каратэ, үстел теннисі, көркем гимнастика және футбол фристайлы сияқты спорт түрлерінен жас спортшылар өз өнерлерін көрсетті. Көпшілік назарына ұсынылған бұл көрсетілімдер жастардың дайындық деңгейі мен спортқа деген ынтасын айқындай түсті. Шара барысында спортшылардың жеңіске деген жігері мен шеберлігі көрермендерді тәнті етті.
Фестиваль кезінде халықаралық және республикалық деңгейде ел намысын қорғап жүрген бірқатар спортшыларға Алғыс хаттар табысталып, олардың еңбегі лайықты бағаланды. Сондай-ақ, көрермендер үшін арнайы сайыстар ұйымдастырылып, белсенді қатысушыларға естелік сыйлықтар таратылды. Ашық аспан астында өткен бұл шара қала тұрғындарына көтеріңкі көңіл күй сыйлап, денсаулықты нығайтуға бағытталған игі бастаманың бастауы болды.
