Тұран ауданының Көмешбұлақ базарында жастарға арналған ақпараттық-түсіндірме іс-шарасы өтті. Аталған жиынға Еңбек мобильділігі орталығының мамандары — Атырханов Ербосын Атырханұлы мен Сүгір Ғазиз Мұханұлы қатысып, мемлекеттік бағдарламалар туралы кең көлемде ақпарат ұсынды. Бұл шара жастардың еңбек нарығына бейімделуіне және кәсіптік әлеуетін дамытуға бағытталды.
Кездесу барысында мамандар «Жастар практикасы», «Алғашқы жұмыс орны», «Қоғамдық жұмыс», «Қоныс аудару» және кәсіпкерлікке оқыту курстарының мазмұны мен шарттарын егжей-тегжейлі түсіндірді. Әрбір бағдарлама бойынша нақты мүмкіндіктер мен қатысу талаптары, сондай-ақ жастарға көрсетілетін әлеуметтік қолдау түрлері талқыланды.
Мәселен, «Алғашқы жұмыс орны» жобасы арқылы жоғары оқу орнын немесе колледжді енді аяқтаған жастар алғашқы еңбек жолын бастауға мүмкіндік алады. Бұл бағдарлама жұмыс беруші мен мемлекет арасындағы ынтымақтастық арқылы жүзеге асырылады: жұмыс беруші жас маманды кемінде 12 айға жұмысқа қабылдайды, ал мемлекет жалақының белгілі бір бөлігін субсидиялайды. Бұл жас кадрлардың кәсіби тәжірибе жинақтауына және болашақта тұрақты жұмысқа орналасуына ықпал етеді.
Сондай-ақ, «Қоғамдық жұмыс» бағыты аясында уақытша еңбекпен қамтылу мүмкіндігі де ұсынылды. Жалақы мемлекет тарапынан төленетін бұл бағдарлама әсіресе жұмыс тәжірибесі жоқ жастар үшін үлкен көмек болып табылады. Мамандар осы бағыттың тиімді тұстарын атап өтіп, қатысушылардың сұрақтарына жан-жақты жауап берді.
Іс-шара барысында қатысушыларға ақпараттық парақшалар таратылып, әрбір бағдарлама бойынша кеңес берілді. Жастар өздерін қызықтырған сұрақтарын қойып, жеке жағдайларына сәйкес келетін бағыттарды нақтылап алды. Мамандар олардың жағдайын жеке қарап, ұсынылатын мүмкіндіктерге бағыт берді.
Кездесу соңында Еңбек мобильділігі орталығының мамандары жастарды белсенді болуға, ұсынылып отырған мемлекеттік қолдау шараларын тиімді пайдалануға шақырды. Олардың айтуынша, қазіргі таңда жастар үшін түрлі бағыттар бойынша жұмысқа орналасу мен кәсіби дағдыны меңгерудің көптеген жолдары бар. Мұндай іс-шаралар алдағы уақытта да жалғасын тауып, қала жастарын қамтуды жалғастырады.
Бастаманың негізгі мақсаты – жастардың еңбекке деген құлшынысын арттырып, әлеуметтік қолдау тетіктері арқылы олардың болашағына нақты бағдар беру. Осындай ақпараттық кездесулер арқылы мемлекет пен халық арасындағы тиімді диалог орнауда.
