Шымкент қаласында еңбек нарығына жаңа қадам басқан жас мамандардың табысты жолы – заманауи білім мен тәжірибенің ұштасуының жарқын дәлелі. Соңғы жылдары мемлекет тарапынан техникалық және кәсіптік білім беруге, дуальды оқыту мен өндірістік тәжірибеге баса назар аударылып келеді. Нәтижесінде, жастар тек теориялық білім алып қана қоймай, нақты еңбек етуге де бейімделуде.
Жас мамандар арасында сұранысқа ие инженерлік, ІТ, сервис және құрылыс салаларында жұмысқа орналасу көрсеткіші артып келеді. Бұл салада табысқа жеткендердің бірі – 2023 жылы техникалық колледжді бітіргендер, бүгінде Шымкенттегі ірі құрылыс компаниясында прораб болып қызмет етіп жүрген Айбек есімді жас маман. Ол өндірістік практика кезінде өзіне сенімділік танытқан жұмыс берушінің ұсынысымен тұрақты қызметке қабылданған.
Мұндай мысалдар аз емес. Жастардың кәсіби жетістігіне түрткі болып отырған бағдарламалардың бірі – «Алғашқы жұмыс орны». Бұл бастама арқылы жұмыс тәжірибесі жоқ жастар 12 айға дейінгі мерзімге жұмысқа қабылданып, жалақылары мемлекет есебінен субсидияланады. Осы уақыт аралығында олар өз қабілетін дәлелдеп, тұрақты жұмысқа тұру мүмкіндігіне ие болады.
Сондай-ақ, «Жастар практикасы» жобасы да жас түлектерге алғашқы еңбек жолын бастауға мүмкіндік беріп отыр. Қалада осы бағдарламаға 2025 жылдың алғашқы жартысында 600-ден астам жас қатысып, олардың басым бөлігі тәжірибе мерзімінен кейін жұмыс берушілер тарапынан тұрақты жұмысқа алынған. Бұл жастардың кәсіби бейімделуінің сәтті көрсеткіші.
Жас мамандардың жетістікке жетуіне тек мемлекеттік қолдау ғана емес, өздерінің білімге, еңбекке деген құштарлығы да әсер етуде. Шымкентте жастарға арналған түрлі шеберлік сабақтары, кәсіби бағдар беру курстары, стартап жобалар мен гранттық байқаулар жиі ұйымдастырылады. Бұл мүмкіндіктерді пайдаланып, өз кәсібін ашқан немесе ірі кәсіпорындарда тәжірибе жинап, басшылық қызметке көтерілген жастардың қатары артып келеді.
Жас еңбек адамы – ел болашағы. Олардың кәсіби тұрғыдан өсуі, қоғамға пайда әкелуі – мемлекет дамуының маңызды факторы. Шымкентте мұндай жас мамандардың саны жыл сайын өсіп, еңбек нарығына жаңа серпін беріп отыр. Ең бастысы – жастардың өз ісіне деген сенімі мен жауапкершілігі жоғары. Осы сеніммен олар еңбек әлемінде өз орнын табуда.
