Түркістан қаласында инфрақұрылымдық даму қарқыны жыл санап артып келеді. Әсіресе, кәріз жүйелерін жаңарту мен кеңейту бағытындағы жүйелі жұмыстар нәтижесінде қаланың санитарлық-тұрмыстық жағдайы біртіндеп жақсарып келеді. Бұл бағыттағы негізгі жобалардың бірі – №2 сарқынды суларды тазарту имаратының жаңғыртылуы. Нысанда механикалық, биологиялық және химиялық тазарту тетіктерін қалпына келтіру жұмыстары жүріп жатыр. Жалпы жобаның құны 400,7 млн теңгені құрайды, ал жұмыстар биыл қараша айында толық аяқталады деп жоспарланған.
Кәріз жүйесін дамыту – тек санитарлық талаптарды орындау ғана емес, қаланың әлеуметтік-экономикалық өсімін қамтамасыз етудің де бір бөлігі. Түркістан облысының әкімдігі бұл бағытта нақты жоспарлар мен кезең-кезеңімен іске асырылатын жобалар әзірлеген. Өңір басшысы Нұралхан Көшеров бұл жұмыстарды бақылауға алып, сапалы әрі мерзімінде орындалуын қадағалауды тапсырды.
Түркістан қаласында 2018 жылы кәріз жүйесіне қосылу көрсеткіші небәрі 15 пайызды ғана құраса, бүгінде бұл көрсеткіш 36,5 пайызға жеткен. Мұндай өсім соңғы бес жылда жүзеге асырылған ірі жобалардың нәтижесі болып отыр. Қазірдің өзінде қолданыстағы сарқынды су жүйелерінің ұзындығы 401,6 шақырымға дейін ұлғайған және бұл желіге 17 581 абонент қосылған.
Жалғасып жатқан жобалар аясында ұзындығы 263,3 шақырым болатын жаңа сарқынды су құбырларын тарту көзделген. Бұл жұмыстар толық аяқталған соң, қала тұрғындарының басым бөлігі орталықтандырылған кәріз жүйесіне қосылатын болады. Қалада 5 сарқынды суларды тазарту имараты, 21 канализациялық сорғы станциясы және 4 шығын реттегіш құдық салу қарастырылған. Бұл нысандардың іске қосылуы Түркістанның кәріз инфрақұрылымын мүлдем жаңа деңгейге шығарады.
Осы уақытқа дейін 13 нысанның құрылысы басталып кеткен. Бұл – тек жаңадан салынатын ғимараттар ғана емес, қолданыстағы жүйелерді жаңарту мен кеңейту жұмыстарын да қамтиды. Соның ішінде 7 жоба 2025 жылдың соңына дейін пайдалануға беріледі деп жоспарлануда. Бұл бастамалар қаланың экологиялық және санитарлық жағдайын жақсартып қана қоймай, халықтың өмір сүру сапасына да оң әсер ететіні сөзсіз.
Инженерлік инфрақұрылым – кез келген қаланың тұрақты дамуы үшін негізгі көрсеткіштердің бірі. Түркістан облысының орталығы ретінде қала заманауи талаптарға сай болуы тиіс. Бұл ретте облыс әкімдігі мен қала басшылығының бірлесіп атқарып жатқан жұмыстары нақты нәтиже беруде. Қаланың өсіп келе жатқан халқы мен жаңа шағынаудандардың қажеттілігін ескере отырып, инфрақұрылым саласындағы бұл жобалар алдағы жылдары да жалғасын таппақ.
Түркістан қаласы тарихи-мәдени орталық ретінде ғана емес, өмір сүруге қолайлы, заманауи инфрақұрылымы бар қала ретінде де қалыптасып келеді. Бұл бағыттағы жұмыстар алдағы уақытта да жалғасып, толық кәріз жүйесімен қамту арқылы қаланың тіршілігі одан әрі жақсара түспек.
