Суицид – қоғамның ең күрделі әрі нәзік әлеуметтік мәселелерінің бірі. Өкінішке қарай, бұл жағдай Қазақстанда ғана емес, бүкіл әлемде өзекті мәселеге айналып отыр. Әсіресе жастар мен жасөспірімдер арасында өз-өзіне қол жұмсау оқиғалары жиілеп барады. Түркістан қаласында да бұл мәселе алаңдаушылық тудырып отыр.
Суицидтің себептері әртүрлі: отбасындағы түсініспеушілік, мектептегі қысым, әлеуметтік желідегі буллинг, жалғыздық, психологиялық күйзеліс, жетістікке жету жолындағы сәтсіздік, материалдық қиындықтар және т.б. Алайда бұл проблеманың ең үлкен ерекшелігі – сырт көзге көрінбейтін ішкі күйзелісте. Көп жағдайда суицид жасауға бейім азаматтар өз сезімдерін жасырады, көмек сұрауға ұялады немесе мән бермейді.
Түркістан қаласында осы бағытта алдын алу шаралары жүйелі түрде жүргізіліп келеді. Мектептерде, колледждерде және Жастар ресурстық орталығында психологиялық тренингтер мен түсіндіру кездесулері ұйымдастырылады. Онда мамандар суицидтік көңіл-күйдің белгілерін тану, өз-өзімен жұмыс істеу, қиын сәтте көмек сұраудың маңыздылығы туралы кеңестер береді. Сонымен қатар жасөспірімдерге эмоционалды тұрақтылықты сақтау жолдары түсіндіріледі.
Мектеп психологтары оқушылармен жеке жұмыс жүргізіп, ата-аналарға да баламен қарым-қатынасты нығайту, қолдау көрсету туралы нұсқаулықтар береді. Себебі, өз-өзіне қол жұмсауға бейім адамның алғашқы белгілері – тұйықталу, оқшаулану, күйзеліске жиі түсу, болашаққа немқұрайлы қарау секілді әрекеттер – ең алдымен жақын жандардың бақылауында болуы тиіс.
Түркістан қалалық ауруханаларында психикалық денсаулықты сақтау бойынша орталықтар жұмыс істейді. Ол жерден кез келген адам құпия түрде кәсіби психолог немесе психотерапевттен кеңес ала алады. Сонымен қатар, 24/7 жұмыс істейтін сенім телефондары, онлайн кеңес беру қызметтері де қолжетімді.
Суицидтің алдын алуда ақпараттық сауаттылық пен қоғамдағы мейірімділік атмосферасы өте маңызды. Қарапайым сөзбен қолдау көрсету, жанашырлық таныту, тыңдай білу – үлкен көмек. Әр азамат қоғамда бір-біріне бейжай қарамаса, қиындыққа тап болған жанға дер кезінде назар аударса – бұл талай қайғылы жағдайдың алдын алуға сеп болады.
Өмір – қайта берілмейтін мүмкіндік. Суицид – шешім емес, бұл өтпелі кезеңдегі ауыр сезімнің нәтижесі ғана. Сол себепті жастармен ашық сөйлесу, жан-жақты қолдау көрсету және оң көзқарас қалыптастыру – әрбіріміздің борышымыз.
