Түркістан қаласында облыс әкімі Нұралхан Көшеровтың төрағалығымен өткен кеңейтілген мәжіліс өңірдің әлеуметтік-экономикалық дамуының жаңа бағытын айқындады. Жиын барысында облыс орталығының қазіргі әлеуметтік көрсеткіштері мен инфрақұрылымдық мүмкіндіктері сараланып, алдағы кезеңге арналған нақты міндеттер белгіленді. Әкімдіктің басты мақсаты – қаланың экономикалық әлеуетін толық іске асырып, тұрғындар үшін қолайлы орта қалыптастыру.
Жиын барысында Түркістан қаласының әкімі Әзімбек Пазылбекұлы өңірде жүзеге асып жатқан жобалар туралы есеп берді. Қалада әлеуметтік, тұрғын үй, инфрақұрылым, экология және өндіріс салаларындағы ілгерілеушілік пен негізгі көрсеткіштерге жеке тоқталды. Сонымен қатар, жиында облыстық басқарма басшылары да сөз сөйлеп, өз салалары бойынша түйткілді мәселелер мен шешу жолдарын ортаға салды.
Облыс әкімі Нұралхан Көшеров 2024–2030 жылдарға арналған жол картасындағы негізгі жобаларға назар аударып, олардың орындалуын жеделдетуді тапсырды. Әсіресе, өңірлік жалпы өнім көлемін ұлғайту, инвестициялық жобалар санын арттыру және жаңа жұмыс орындарын ашу — негізгі басым бағыт ретінде белгіленді. Қаланың кіріс көздерін көбейту мақсатында кәсіпкерлік, өндіріс және туризм бағыттарында нақты қадамдар жасалуы тиіс екені атап өтілді.
Облыс басшысы өз сөзінде Түркістанның тек Қазақстан ғана емес, бүкіл түркі әлемі үшін маңызы зор рухани орталық екенін атап өтті. Қаланың тарихи маңызын ескере отырып, оны әлеуметтік-экономикалық тұрғыда дамыту – баршаға ортақ міндет екенін ескертті. Сонымен қатар, Президент тапсырмасымен жүзеге асып жатқан «Таза Қазақстан» бағдарламасының маңыздылығына ерекше тоқталды. Бағдарлама – уақытша науқан емес, тұрғындардың күнделікті өмір салтына айналуы тиіс дәстүр. Облыс әкімінің пікірінше, экологиялық мәдениет пен тазалық мәселесі әрбір азаматтың жеке жауапкершілігімен тікелей байланысты.
Қалада соңғы жылдары елеулі серпін байқалуда. 2025 жылдың алғашқы жеті айының қорытындысы бойынша Түркістан қаласының халық саны 241,7 мың адамнан асты. Бұл – қаланың жыл санап өсіп, жаңа шағын аудандардың бой көтеруіне, тұрғын үй қажеттілігінің артуына негіз болып отыр. Жалпы өңірлік өнім көлемі 31,3 пайызға артып, 272 млрд теңгені құрады. Бұл көрсеткіш – экономикалық белсенділіктің артуы мен мемлекеттік қолдаудың нәтижесі.
Қазіргі таңда қаланың екі өндірістік аймағында жалпы құны 225 млрд теңгеден асатын 50-ден астам жоба жүзеге асырылуда. Оның ішінде өңдеу өнеркәсібі бағытында 29,1 млрд теңге инвестиция тартылып, 1500 жаңа жұмыс орны ашылмақ. Бұл – өңір үшін тұрақты жұмыспен қамтудың және табыс көздерінің артуының нақты кепілі.
Әлеуметтік салада да нақты нәтижелер бар. Биыл 944 пәтер әлеуметтік баспана ретінде тұрғындарға берілмек. Сонымен қатар, жеті айдың ішінде 160,1 мың шаршы метр тұрғын үй пайдалануға берілді. Бұл көрсеткіш жыл сайын өсіп келеді. Қалада кәріз жүйесімен қамту үлесі 36,5%-дан 56,3%-ға дейін өседі деп күтілуде. 2026 жылға қарай бұл көрсеткіш 92%-ға жетеді деген жоспар бар.
Қаланың абаттандырылуы мен экологиялық жағдайын жақсарту мақсатында 5 жаңа саябақтың құрылысы басталды. Биылғы көктем мен жаз айларында 300 мың түп ағаш отырғызу жоспарланған. Қаланың тазалығы үшін 600 жұмысшы күнделікті еңбек етуде, ал жыл басынан бері 28 мың тоннадан астам тұрмыстық қалдық шығарылған. Қаланың көркін арттыру бағытында 33 көпқабатты тұрғын үйдің қасбетін қалпына келтіру жұмыстары жүргізілуде.
Түркістан қаласының әлеуметтік-экономикалық серпіні тек көрсеткіштермен өлшенбейді. Бұл – жаңа дәуірдің бастауы, рухани астананың заманауи келбетін қалыптастыру жолындағы батыл қадамдардың көрінісі. Алдағы уақытта да атқарылатын жұмыстардың ауқымы кеңейіп, тұрғындар игілігі үшін нақты нәтижелер берері сөзсіз.
