Конституцияға енгізілетін өзгерістер болашақта біздің қоғамның, жекелеген азаматтардың және келешек ұрпақтарымыздың да өмір сапасының жақсаруына әсер етеді. Сондықтан әрбір азамат референдумға жәй қатысып қана қоймай, қандай өзгерістер үшін дауыс беріп жатқанын түсініп, оның мәнін ұғынуы тиіс.
Бүгін Шымкент қаласы Азат шағын ауданында орналасқан №68 орта мектептің ұжымымен кездескен ҚР Президенті жанындағы Ұлттық қоғамдық сенім кеңесінің және Референдумды қолдау жөніндегі республикалық штабтың мүшесі Максим Рожин осылай деді.
–Бұған дейін де Конституцияға бірнеше рет өзгерістер енгізілді. Бірақ, оның барлығы Парламент депутаттарының дауыс беруі арқылы бекітілетін еді. Бұл жолғы өзгерістердің ауқымы өте кең, Ата Заңның 33 бабына өзгерістер мен толықтырулар енгізіледі. Бұл мемлекеттік жүйесі, Парламенттің өкілеттілігі мен сот жүйесінен бастап, қоғам өмірінің барлық негізгі салаларын қамтитын өзгерістер болып отыр. Ол өзгерістер болашақта біздің қоғамның, жекелеген азаматтардың және келешек ұрпақтарымыздың да өмір сапасының жақсаруына әсер етеді. Сондықтан әрбір азамат референдумға жәй қатысып қана қоймай, қандай өзгерістер үшін дауыс беріп жатқанын түсініп, оның мәнін ұғынуы тиіс, – деді Референдумды қолдау жөніндегі республикалық штабтың мүшесі Максим Рожин.
Кездесуге AMANAT партиясы Шымкент қалалық филиалының атқарушы хатшысы Жанар Бектаева да қатысып, ұстаздар қауымының ұсыныс — пікірлерін тыңдап, сауалдарына жауап берді.
Айта кетейік, ҚР Конституциясына өзгерістер мен толықтырулар енгізу жөніндегі республикалық референдум 2022 жылғы 5 маусым күні өтеді және жалпы қала тұрғындары мен қонақтарын өз таңдауларын жасауға шақырамыз, деп хабарлайды қала әкімінің баспасөз қызметіне сілтеме жасаған no-comment.kz.
