БӘЙДІБЕКТІК ҰСТАЗ КӘСІПКЕРЛІКПЕН АЙНАЛЫСЫП ҚОСЫМША ТАБЫС ТАУЫП ОТЫР

Бүгінде ауданымызда қыз-келіншектер арасында қолдан бұйымдар жасау ісі артып келеді. Солардың бірі Бәйдібек ауданы, Кеңестөбе ауылының тұрғыны Мөлдір Торланбаева. Мөлдір Сейітқұлқызының негізгі жұмысы Кеңестөбе ауылындағы Қ.Сыпатаев атындағы мектептің көркем еңбек пәнінің мұғалімі. Жұмыстан тыс уақытта қолөнер бұйымдарын жасаумен айналысады.
- Тұрмыс құрған ауылымдағы мектепте еңбек пәнінің ұтазымын. Бұл пәнде қандай сабақ өтілетіні сұрамаса да белгілі. Қолымнан түрлі бұйымдар жасау ісі келетіндіктен ұстаздықтан бөлек гүлдермен көмкерілген бөлме шамдарын жасауды қолға алдым. Қыр-сырын меңгеру мақсатында ғаламтордан ізденіп, арнайы сабағын оқыдым. Еңбектенгеннің нәтижесінде тез үйрініп, осындай әдемі бөлме шамдарын жасаумен айналысып келе жатқаныма бір жылға жуық уақыт болды. Осы уақытқа дейін 100-ден аса гүлдермен көмкерілген бөлме шамдарын жасадым. Гүлдерден бөлек қабырға суреті және құстар бейнеленген шамдар жасаймын. Мектептегі мұғалімдік жұмысыма кедергі болмау үшін тапсырысты бос уақытымда орындап, бір айда 20-25 бөлме шамдарын жасаудамын. Күн санап сұраныс артуда. Гүлдердің материалын тапсырыспен Ресей мемлекетінен алдырамын. Изалон материалы өте төзімді, жууға ыңғайлы ,түсін бермейді. Жалпы адам жақсы өмір сүру үшін жан-жақты, ізденісте болып, еңбек ету керек. Еңбектің наны тәтті, Еңбектенсең ғана болашағың жарқын болады дейді, - Мөлдір Торланбаева.
Жасаған бұйымдарымен облыстық байқауларға қатысып, жүлделі орыннан көрініп жүрген Мөлдірдің шәкірттері де облыстық байқауға қатысып, "Алтын қазына" балалар шығармашылығанда гүл композициясын құрастыру бағытында жоғары деңгейде қорғап 1 орын иеленген. Қ.Сыпатаев атындағы мектепте «Қыз еркем ісімен көркем» үйірме тобында шәкірттер тәрбиелеуде екен. Мектептен бөлек ғаламтор арқылы гүлдермен көмкерілген бөлме шамдарын жасауды үйренемін деушілерге сабақ береді.
Еске саларлық, алдыңғы айда Елордада І республикалық педагогтер съезі өткен болатын. Жиынға Мемлекет басшысы Қасым-Жомарт Тоқаев арнайы қатысқан болатын. Сон­дай-ақ маңызды іс-шара­ға еліміздің әр өңірінен 700-ден аса педагог жиналды.
Республикалық педагогтер съезін ашқан Президент әуелі білім беру саласының қызметкерлерін кәсіби мерекемен құттықтады.
– Бүгін, шын мәнінде, өте маңызды жиын. Себебі ұстаз – ең алдымен, қадірлі маман. Ал ұстаз болу – қастерлі міндет. Бүгінде еліміздің болашағы жарқын болып, дамыған мемлекетке айналуы үшін мұғалімдер қауымы аянбай еңбек етіп жүр. Жалпы, кім-кімнің де жақсы адам, мықты маман болуы ұстазына байланысты. Ахмет Байтұрсынұлы «Біз елді түзеуді бала оқыту ісін түзеуден бастауымыз керек» деген. Ұлт ұстазының бұл сөзі қашанда орынды. Білім мен ғылым – табысқа жетудің ең басты кілті. Өскелең ұрпаққа тағылымды тәрбие және озық білім беру – өте маңызды міндет. Менің бастамаммен 2019 жылы «Педагог мәртебесі туралы» заң қабылданды. Кейінгі төрт жылда ұстаздардың жалақысы 2 есе өсті. Жақында балабақша тәрбиешілерінің айлығы 30 пайызға көбейді. Ұстаздардың еңбек демалысы ұзартылды. Мұғалімнің міндетіне кірмейтін артық жұмыстың бәрі алынып тасталды. Ұстаздардың кәсіби біліктілігін арттыру мәселесіне баса мән беріліп жатыр. «Болашақ» бағдарламасымен үш жылда 220-ға жуық педагог шетелде оқып келді. Мұғалім мамандығын таңдаған жастарға қойылатын талап күшейді. Осы саладағы студенттердің стипендиясы 2,5 есе көбейді. Бір сөзбен айтқанда, ең алдымен білікті ұстаз даярлау ісіне айрықша мән беріп отырмыз, – деді Мемлекет басшысы.
Президенттің айтуынша, жаңа дәуірде мектептің жағдайы мем­лекеттің дамуына тікелей ық­пал етеді. Ал мектептің қан­дай болмағы ұстазға байланыс­ты. Бүгінде педагогика сала­сы ғылымның ең маңызды тар­ма­ғының біріне айналды. Сон­дықтан бұл салаға түбегейлі жаңа көз­қарас қажет. Заманауи техно­ло­гияның көмегімен білім беру жү­йесін жедел әрі тиімді жаң­ғыр­туға болады. «Білім сала­сын ең үздік халықаралық стан­дарт­тарға сай дамыту керек. Мұғалім­дер­дің қажырлы еңбегі және оқушы­лардың дарыны мен талабы нақты жемісін беріп келеді. Өрендеріміз ширек ғасырда әлемнің ең беделді пән олимпиадаларынан 12 мыңға жуық медаль иеленді. Бұл – Израиль, Түркия, Канада сияқты білім сапасы жоғары мемлекеттермен шамалас көрсеткіш. Осының бәрі – педагогтердің табанды ең­бектенгенінің жемісі.
– Бірінші мәселе. Ұстаздардың біліктілігін арттыруымыз керек. Мағжан Жұмабайұлы «Алты Алаштың баласы бас қосса, төр – мұғалімдікі» деген. Халқымыз келешектің кілті білімде екенін терең түсінген. Сол себепті ұс­таз­ды ерекше қадірлеген. Пе­дагог – ұлттың жаңа сапасын қа­лып­тастыру үдерісіндегі ең ма­ңыз­ды буын. Сондықтан білім беру жүйесін жоғары білікті маман­дармен толық қамтамасыз ету өте маңызды. Алайда қазір мек­теп­терімізде мамандар тапшы. Бүгін­де елімізде 5 мың педагог же­тіс­пейді. Бұл көрсеткіш жыл­дан-жылға артып барады. Ал педа­гогика саласында оқыған әрбір бесінші түлек өз мамандығы бойынша жұмыс істемейді. Бұған қо­са мұғалімдердің 23 пайызында ғана жоғары біліктілік санаты бар. Мұның бәрі педагогтерді даяр­лау және олардың білік­тілігін арттыру тәсілдерін түбе­гейлі өзгертуді қажет етеді. Жоға­ры оқу орындарындағы пе­д­а­го­гикалық мамандықтарға қа­тыс­ты бағдарламалардың басым бөлігі заман талабын ескермейтін бұрын­ғы әдістемелерге негіздел­ген. Заманауи тәсілдер мен техноло­гияны енгізе отырып, оқу бағ­дар­ламаларын қайта қарау, жаңғырту қажет, – деді Мемлекет басшысы.
Қасым-Жомарт Тоқаевтың айтуынша, тағы бір маңызды міндет – қала мен ауыл мектептеріндегі білім сапасының теңсіздігін жою. Ауыл балаларының білім алу мүмкіндігі шектеулі екені баршаға мәлім. Бұған қажетті құрал-жабдықтың және білікті педагогтердің тапшылығы себеп болып отыр. Ауылдағы білім ошақтарының тең жартысы – шағын мектептер. Онда барлық пәннің мұғалімі бола бермейді. Бір сыныпта әртүрлі жастағы балалар оқиды. Мұның бәрі – жылдар бойы қордаланған түйт­кілдер. Оның көбі жұрттың жаппай қалаға көшуіне байланыс­ты туындады.
– Ауыл мектептерін зият­керлік, сондай-ақ қоғамдық орта­лық ретінде дамыту маңызды. Ауыл мектебі жергілікті жұртты ортақ іске жұмылдырады. Осы орайда кәсіпкерлер қауымына да зор міндет жүктеледі. Қазір мемлекет пен бизнестің серіктестігі арқылы ауыл мектебін жаңғырту жұмыстары қолға алынды. Осы тәсілмен үш жылдың ішінде кем дегенде мың ауыл мектебін керек-жарақпен толық жабдық­тау қажет. Ауыл мектептерінің кі­тап­ханаларын дамыту мәселе­сіне баса мән берген жөн. Кітап­ханада қажетті кітаптың бәрі болуы керек. Яғни әдебиет қала және ауыл оқушыларына бір­дей қолжетім­ді болуға тиіс. Бала­ларға тең мүмкіндік беру үшін білім сапасын барлық аймақта бірдей жақсарту керек. Отбасы жағдайына, өскен ортасына қарамастан, барлық баланың сапалы білім алуға қақы бар, – деді Президент.
Мемлекет басшысының мә­лім­деуінше, жалпы, білім беру жүйесін мүлде жаңа деңгейге шығару үшін ауқымды цифрлық трансформация жұмыстарын жүргізу керек. Ең алдымен, 2027 жылға дейін интернет желісі әлі тартылмаған мектептердің бәрін жылдамдығы жоғары интернетке қосу қажет. Бұл ретте олардың әрқайсысында жергілікті желі орнатылуға тиіс. Бұл өзекті мәселені шешуге «Қолжетімді интернет» ұлттық жобасы септігін тигізеді. Сонымен қатар барлық мектеп оқушысына сапалы оқыту контенті бар озық цифрлық платформалардың, соның ішінде электронды оқулықтардың қол жетімділігін қамтамасыз ету маңызды. Бұл ретте барлық материал салалық сараптамадан мұқият өткізілуі керек.