Бүгін Шымкент қаласының әкімі Ғабит Сыздықбеков салалық басқарма басшыларымен бірге қаланы жаяу аралады. Азаматтарды қабылдау барысында «Шұғыла» шағынауданы, Қазына көшесінің тұрғыны Сырға Тәжібаева жер қатынастары саласына қатысты мәселесін көтерген болатын. Жауапты мамандарға бұл өтінішті қолданыстағы заңнамаға сәйкес зерделеу тапсырылды, деп хабарлайды No-comment.kz ақпарат агенттігі.
Сонымен қатар, 110/10 кВ «Дендропарк» қосалқы стансасының құрылыс барысымен танысты. Станса салынып жатқан тұрғын үй кешендері мен әлеуметтік нысандарды сапалы энергиямен қамтамасыз етуге мүмкіндік береді.
Одан әрі Қаратау ауданындағы «Үш бұлақ» балалар лагеріне барды. Шаһар басшысы лагерьдің инфрақұрылымымен танысып, балалардың тамақтануы мен бос уақытын ұйымдастыруына, сондай-ақ нысанның кешенді қауіпсіздік жүйесіне баса назар аударды. Жауапты басқарма басшысына мектеп оқушыларының жазғы демалысы қауіпсіз, қызықты әрі пайдалы өту үшін тиісті барлық шара қабылдау бойынша тапсырма берді.
Сондай-ақ бүгін шетелдік инвестор “Guyi Holding Company” өкілдерімен кездестім. Компания Шымкентте электромобиль шығару бойынша ірі инвестициялық жобаны жүзеге асырмақ. Жаяу аралау барысында инвесторларды «Жұлдыз» индустриялық аймағымен таныстырды. Зауыт салуға мүмкіндік бар учаскелерді бірге аралады.
Бұдан бөлек «Шымтау» жаңа тұрғын алабында болды. Халық жарық пен газ мәселесін көтеріп, асфальт төсеу және қоғамдық көлік бағытын ұзарту бойынша өтініштерін білдірді. Әңгімелесу барысында барлық мәселелер өзектілігіне қарай кезең-кезеңімен шешілетінін жеткізді.
Әкім бастаған топ 17 шағынаудан тұрғындарының да шағымын назардан тыс қалдырмады. Көпқабатты үйлердің ауласында мердігер мекеме ойын алаңын қиратып кеткен. Тексеру барысында олардың қателескені анықталды. Енді компания жақын арада ойын алаңын өз қаражаты есебінен қалпына келтіріп, жаңа элементтермен толықтыратынын болады.
