2024 жылғы 16 қыркүйекте ҚР Орталық референдум комиссиясының Төрағасы Нұрлан Әбдіров ТМД байқаушылар Миссиясы Штабының басшысы Олег Кулебаны қабылдады, деп хабарлайды No-comment.kz - Қазақстан Республикасының Орталық Сайлау комиссиясына сілтеме жасап.
Олег Кулеба республикалық референдумды байқау бойынша ТМД-дан байқаушылар Миссиясы Штабының ашылуы мен жұмысының басталуы туралы хабарлады. Ол Қазақстан өңірлеріндегі референдум учаскелерінде халықаралық байқауды жүзеге асыратын Достастық елдерінен 50-ге жуық байқаушыны тарту жоспарланып отырғанын атап өтті.
Кездесу барысында Нұрлан Әбдіров пен Олег Кулеба 2024 жылғы 6 қазанға тағайындалған республикалық референдумға халықаралық байқауды ұйымдастыру мәселелері бойынша пікір алмасты.
ОРК басшысы ТМД-дан байқаушылар Миссиясы мен ҚР Орталық референдум комиссиясы арасында тығыз ынтымақтастық орнатылғанын атады.
Сондай-ақ Нұрлан Әбдіров халықаралық байқаушылар қызметі үшін барлық қажетті жағдайлар жасалатынын айтты.
