26 қыркүйектен 2 қазанға дейін 6 қазанға тағайындалған республикалық референдум өткізуге дайындық шеңберінде ҚР Орталық референдум комиссиясының мүшелері еліміздің қалған өңірлеріне барды, деп хабарлайды No-comment.kz - Қазақстан Республикасының Орталық Сайлау комиссиясына сілтеме жасап.
Осылайша, ОРК төрағасының орынбасары Константин Петров пен ОРК мүшесі Сабила Мұстафина Ақтөбе, Алматы облыстары мен Астана қаласына барды, ОРК мүшесі Шафхат Өтемісов Маңғыстау облысында болды, ОРК мүшесі Анастасия Щегорцова Қарағанды облысындағы референдум комиссияларының қызметін тексерді, ал ОРК мүшесі Асылбек Смағұлов Абай облысында референдумға дайындығын тексерді.
Сапар барысында ОРК мүшелері аумақтық референдум комиссияларының мүшелері үшін оқыту семинар-кеңестерін өткізді, онда дауыс беруге арналған учаскелердегі жұмыс тәртібін егжей-тегжейлі түсіндірді, сондай-ақ барлық қызықтырған сұрақтарға жауап берді. Заңнаманы сақтау және дауыс беру процесінің ашықтығын қамтамасыз ету мәселелеріне ерекше назар аударылды. Семинардың тәжірибелік бөлігі «Дауыс беру күні» іскерлік ойыны түрінде, дауыс беру күні іс-қимылдардың тәжірибеге бағдарланған әдістері мен алгоритмін қолдана отырып, қолданыстағы сайлау тәжірибесі мен заңнамаға сәйкес олардың практикалық шешімдері негізінде кейстік жағдайларды пысықтаумен өткізілді.
ОРК мүшелері кеңестерге қатысушыларға ағымдағы жылдың маусым айында қабылданған республикалық референдум туралы заңнамадағы жаңашылдықтарды түсіндірді. Науқанды дайындау мен өткізудің ерекшеліктері, сайлау заңнамасының негіздері және оны сайлау процесінде қолдану тәжірибесі туралы айтылды. Референдумның негізгі кезеңдерінің ерекшеліктері, мүгедектігі бар адамдардың сайлау құқықтарын қамтамасыз ету, электоралдық оқыту, ұлттық және халықаралық байқаушылардың жұмысы және т. б. мәселелер егжей-тегжейлі қаралды.
Өз кезегінде аумақтық референдум комиссияларының төрағалары алдағы референдумға дайындық, науқанды ұйымдастырушылық және материалдық-техникалық қамтамасыз ету, мүгедектігі бар азаматтар үшін референдум учаскелерінің қолжетімділігін қамтамасыз ету, учаскелерге бюллетеньдерді жеткізу, сондай-ақ қалалар мен аудандарда консультациялық call-орталықтардың жұмысы, дауыс берушілер тізімінде азаматтарды тексеруге арналған онлайн-сервистер мен телеграмм-боттарды іске қосу бойынша атқарылған жұмыстар туралы баяндады.
Барлық барған өңірлерде Комиссия мүшелерінің кәсіби біліктілігі мен құқықтық құзыреттілігін арттыруға баса назар аударылады.
Барған өңірлерде комиссия мүшелері комиссиялардың заңнамаға сәйкес дауыс беруге дайындығына жеке көз жеткізіп, тиісті оқыту жүргізді.
Комиссия мүшелерін үй аралау және дауыс берушілерге жеке шақыруларды тапсыру қажеттілігіне бағдарлай отырып, алдағы республикалық референдум туралы азаматтарды жүйелі және уақтылы хабардар етудің маңыздылығына ерекше назар аударылды.
Сонымен қатар, ОРК мүшелері дауыс беруге арналған учаскелерге барып, олардың материалдық-техникалық қамтамасыз етілуімен және дауыс беруді өткізу жағдайларымен танысты. АРК мүшелерінің референдумға қатысуға құқығы бар азаматтардың тізімдерімен, бюллетеньдермен жұмыс істеуге, сондай-ақ байқаушылар мен БАҚ үшін жағдайларды қамтамасыз етуге дайындығы тексерілді. Референдум учаскелеріне дауыс берушілер үшін жағдай жасауға және мүгедектігі бар адамдар үшін кедергісіз қол жеткізуге ерекше назар аударылды.
