Спорттық құзға өрмелеуден Қазақстан командасының мүшесі Әмір Маймұратов өткен демалыс күндері ел рекордын орнатып, олимпиадалық квотаны еншіледі. Парижде ол «жылдамдық» дисциплинасы бойынша сынға түседі, деп хабарлайды no-comment.kz тілшісі Olympic.kz сайтына сілтеме жасап.
Демалыс күндері Венгрияның Будапешт қаласында өткен спорттық құзға өрмелеуден Олимпиадаға іріктеу турнирінде Маймұратов екінші орыннан көрінді. Ал екі іріктеу кезеңінің қорытындысы бойынша спортшы үшінші орын иеленіп, квотаға қол жеткізді.
- Әмір, Шанхайда өткен бірінші кезеңнен соң сіз оныншы орыннан да төмен сырғыдыңыз. Алайда, Венгрияда финалға жетіп, нәтижеңіз әлдеқайда жақсарды. Квота да қоржынға түсті. Осы аралықта сіздің дайындық жүйеңізде не өзгерді?
- Негізі, Шанхайдағы турнирде мен нағыз бабымда болдым, кем дегенде үздік үштіктен көрінуім керек еді. Алайда, финалдық кезеңдерде ауыр қате жіберіп, 11-орында қалып қойдым. Венгриядағы жарысқа мен психологиялық тұрғыдан көбірек дайындалдым. Себебі, физикалық жағынан күш жеткілікті еді. Егер өз күшімнің 70 пайызын пайдалансам, жолдама қолға түсетінін білдім.
- Венгрияда сіз Қазақстан рекордын да орнаттыңыз. Бұл Олимпиада қарсаңында сізге қосымша жігер бере ме?
- Мен 2015 жылдан бері жаттығуларда әлем рекордтарын жаңарта бастадым. Менің ең басты қателігім де сол еді. Әлемдік рекордтарды жаңартуға көп күш салып кеттім. Осы ойдан қалай арылдым, нәтижелерім де солай биіктей бастады. Бұған дейінгі ел рекордын да мен орнатқан едім, оны үнемі жаңартып отырамын. Сондықтан, айтарлықтай сезім жоқ. Кезекті нәтиже.
- Сіздің дисцплинада жылдамдықтан басқа тағы қандай нәрселер маңызды?
- Ең бастысы – жақсылап ұйықтап, физикалық және ментальды тұрғыдан демалу. Миым ақпаратты тез қорыту үшін керек бұл. Өйткені, біз трассада бес секундтан да аз уақыт жүреміз. Одан бөлек, өзіңе деген сенім де қажет.
- Олимпиадаға баратыныңыз қандай сезім сыйлады?
- Ашығын айтсам, қандай да бір эмоция жоқ. Квотаны сенімді түрде алу керектігін ойлайтынмын. Алтын медаль алу үшін өзімді дайындап жатырмын. Сол үшін бар күшімді саламын. Олимпиадаға дайындық әдеттегідей Алматыда өтеді.
