Судьяларды тәртіптік жауапкершілікке тарту - ҚР Жоғары Сот Кеңесі қызметіндегі бағыттардың бірі. ЖСК мүшесі Нұрия Сисенова ОКҚ алаңында өткен баспасөз мәслихатында түсіндіргендей, Кеңесте судьялар, қоғамның екі өкілі мен адвокатурадан тұратын Сот алқасы жұмыс істейді. 1 қазанға дейін Сот алқасының құрамында 9 мүше болды, енді заңнамалық түзетулерге сәйкес олардың саны 15-ке дейін артты, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
Судьяларды тәртіптік жауапкершілікке тартудың жаңа тетігі ағымдағы жылдың 1 қазанынан бастап күшіне енді.
«Егер бұрын судья сот ісін қарау кезінде заңдылықты өрескел бұзуға жол берсе, оның материалы жалпы отырыстың қарауына келіп түсті. Егер облыстық немесе Жоғарғы Соттың жалпы отырысы судьяны тәртіптік жауапкершілікке тартудың қажеті жоқ деген қорытындыға келсе, онда материал Сот алқасына жіберілмеді. Енгізілген жаңа тетік жалпы отырыстың кез келген жағдайда судьяға қатысты материалды Сот алқасына жіберу немесе жібермеу туралы қорытындысына қарамастан, құжаттарды Сот алқасына жіберуді көздейді. Негізінен судьялардан тұратын Сот алқасы судьяның іс-әрекетінде тәртіптік теріс қылықтың болуы туралы мәселені шешу керек. Сонымен қатар Сот алқасы Судьялардың әдеп кодексін бұзғаны үшін тәртіптік жауапкершілігі туралы мәселені қарайды», – деп түсіндірді Нұрия Сисенова.
Бұл шаралар сот төрелігін жүзеге асыру сапасын, судьялардың жауапкершілігін арттыруға бағытталған.
