Саран техникалық колледжі ұйымдастырған дөңгелек үстел барысында қандай мамандарды даярлау қажеттілігі, білім беру мен бизнестің өзара іс-қимылын қалай нығайту керектігі талқыланды. Бас қосуға жұмыс істеп тұрған кәсіпорындар мен ашылуға дайындалып жатқан нысандардың өкілдері қатысты. Шараға сондай-ақ Қарағанды облысының Мансап орталығы, Кәсіпкерлер палатасы да тартылды.
– Бірінші кезекте индустриалды аймақтың артықшылықтарын жергілікті тұрғындар сезінсе деймін. Осыған байланысты біз де бір орында тұрмаймыз. Сіздермен бірге дамығымыз келеді. Сіздерге бейімделіп, жаңа мамандықтарды қажеттіліктеріңізге қарай ашамыз. Менің ойымша, жергілікті тұрғындар басымдыққа ие болуға тиіс: мектеп түлектері басқа қалаларға оқуға бармай, осы жерде, Саранда мамандық алып, жұмысқа орналасуы керек, – дейді Саран техникалық колледжінің директоры Алина Есімханова.
Ол «Полимер өндірісі» құзырет орталығын ашу жоспары туралы айтып берді. Бұл өзекті мәселе, себебі қалада бірнеше кәсіпорын осы салада жұмыс істейді.
Колледжде «полимерлік өндіріс технологиясы», «тоңазытқыш компрессорлық машиналар мен қондырғыларды монтаждау және пайдалану», «құбыр өндірісі» сияқты жаңа мамандықтар ашылады.
Колледждің әлеуметтік серіктестерінде индустриялық аймақта жұмыс істейтін компаниялар бар. Ыстық мырыштау зауыты әлі ашылмаған, бірақ онымен ынтымақтастық басталды: Жол картасына қол қойылды. Дәнекерлеу ісі мамандарын бірлесіп даярлау туралы келісім бар.
Колледжде 395 студент білім алуда. Дуалды оқытумен 41% қамтылған. Міндет – студенттердің кәсіпорындарда нақты жағдайларда практикалық дағдыларға ие болуы үшін осы бағытта алға жылжу.
Бірлескен жоба «Қазақстан халқына» қорымен де талқылануда. Колледжде «жерасты электр слесары» мамандығы бойынша оқитын студенттерге арналған заманауи шеберхана немесе зертхана жабдықтау көзделген.
QazTehna компаниясы колледжде атаулы кабинет ашып, ғимаратты өз қаражатына жөндемекші.
– Біз Саран техникалық колледжімен кәсіпорын іске қосылғалы бері жұмыс істеп келеміз. Жыл сайын студенттерді тәжірибеге аламыз, дуальді оқытуға қатысамыз. Жалпы, кадрларды даярлауда бастапқы кезеңде қиындықтарға тап болдық. Мысалы, мамандықтардың бірыңғай біліктілік анықтамалығы, тіпті онда біздің негізгі мамандықтарымыз болмаған. Бұл бағытта көп жұмыс істеуге тура келді. Қазір бізде Қарағанды облысының төрт колледжімен стратегиялық серіктестік бар. Көлік-технологиялық колледжімен «автокөлік құралдарының сырлаушысы» мамандығын ашамыз. Биыл Қазақстанда бірінші болып Қарағанды индустриялық университетімен «автомобиль жасау» бакалавриатының білім беру бағдарламасын аштық, – деді QazTehna компаниясының корпоративтік университетінің басшысы Айдос Айтбаев.
Кездесуде колледж бен кәсіпорындар арасында әріптестік туралы жаңа меморандумдарға қол қойылды.
