Ұлттық ұлан әскерлерінің Бас қолбасшылығы қылмыстар, келеңсіз оқиғалар және әскери қызметшілердің қаза болуының алдын алу шараларын қабылдауда. Ол туралы Орталық коммуникациялар қызметінде өткен баспасөз мәслихатында ҚР Ішкі істер министрлігі Ұлттық ұланның тәрбие және әлеуметтік-құқықтық жұмыс Бас басқармасының бастығы полковник Нұрбай Бектұрсынов айтып берді, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
Оның айтуынша, қазіргі уақытта Ұлттық гвардияның әскери қалашықтары 216 бейнебақылау жүйесімен жабдықталған. Оның ішінде 51 жиынтық – «Ұлан» жүйесі және 165 жиынтық-жеке жабдықталған бейнебақылау жүйелері. Жалпы әскери қалашықтардың аумақтарында, жатын бөлмелерде, қару сақтауға арналған бөлмелерде, асханаларда, жуынатын бөлмелерде, тұрмыстық қызмет көрсету бөлмелерінде, жауынгерлік қызмет атқару орындарында және тәуліктік нарядтарда орнатылған 3218 бейнебақылау камерасы жұмыс істейді. Ағымдағы жылдың соңына дейін әскери қалашықтарда қосымша 1000-ға жуық бейнебақылау камераларын орнату жоспарлануда. Ұйымдастырушылық шаралардан бөлек, офицерлердің психологиялық-педагогикалық құзыреттілігін және психологтардың кәсібилігін арттыру мақсатында Орталық Азия өңірінің когнитивті-мінез-құлық терапиясы қауымдастығы, International Academy of Emotional Intelligence және «Тұран» университетімен психологиялық денсаулық саласындағы жетекші ұйымдармен меморандумдар жасалды.
«Командирлерді суицидтік көріністерді ерте анықтау дағдыларына үйрету, сондай-ақ отбасылық-тұрмыстық зорлық-зомбылық, құмар ойындар (лудомания), нашақорлық, суицид және әскери қызметшілердің эмоционалдық күйзеліске түсуінің алдын алу мәселелерін шешу бойынша жұмыс істейміз. Біздің психологтардың ғана емес, басқа да күш құрылымдары өкілдері, психикалық денсаулық орталықтарының психиатр-дәрігерлерінің қатысуымен әскери бөлімдерге көшпелі профилактикалық іс-шаралар ұйымдастырылды. Олардың негізгі мақсаты - мониторинг, бөлімшелердегі моральдық-психологиялық ахуалды зерттеу, бейімделуде қиындықтарға тап болған әскери қызметшілерді анықтау», - деді спикер.
Нұрбай Бектұрсынов соңғы үш жылдағы профилактикалық жұмыс қылмыстық құқық бұзушылықтар санының төмендеуіне қол жеткізгенін атап өтті. Сонымен қатар әскерлерде ұйымдасқан қылмысқа жол берілмейді, жүйелі және топтық құқық бұзушылықтар жоқ. Алайда, әскери қызметшілердің қаза болуының алдын алу, әскери қызметтің қауіпсіздігін қамтамасыз ету мәселесі өзекті және командирлер мен бастықтардың жұмысында оған баса назар аударылады.
«Сонымен бірге, әскерилердің өміріндегі проблемалардың объективті және субъективті себептеріне, әскери қызметшілерінің моральдық-психологиялық жағдайына қарамастан, Ұлттық ұлан барлық қызметтік-жауынгерлік міндеттің орындалуын қамтамасыз етеді», - деп түйіндеді ол.
