Орталық коммуникациялар қызметінің алаңында «Атамекен» ҚР ҰКП басқарушы директоры - Кәсіпкерлерді құқықтық қорғау департаментінің директоры Серік Әділов Ұлттық кәсіпкерлер палатасының заңнамалық шектеулерге байланысты қылмыстық процесте бизнестің мүдделерін тікелей білдіруге мүмкіндігі жоқ екенін айтты. Алайда, «Атамекен» ҰКП бизнестің тергеу органдарымен бетпе-бет қалуына жол бере алмайды. Сондықтан Бас прокуратура, Қаржы мониторингі агенттігі,Жоғарғы сот, Сыбайлас жемқорлыққа қарсы іс-қимыл агенттігімен тығыз қарым-қатынас орнатылды, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
«Кәсіпкерлердің палатаға жіберген шағымдарын талдау бизнесті қылмыстық жауапкершілікке тартудың үш негізгі себебін анықтауға мүмкіндік берді. Біріншіден, сотқа дейінгі тергеулерді жеткілікті негізсіз тіркеу, сондай-ақ бизнесті тексеру немесе аудит актілерінсіз және кейде қылмысқа итермелеу арқылы қылмыстық процеске тарту. Осылайша, төрт жылдан астам уақыт бойы Алматы қаласының кәсіпкері жалған шот-фактураларды жазып бергені үшін қылмыстық қудалауда болды. Прокуратура органдарының араласуынан кейін ғана қылмыстық құқық бұзушылық құрамының болмауына байланысты іс тоқтатылды, өйткені құқыққа қайшы әрекеттерге Экономикалық тергеу департаменті итермеледі», - деп атап өтті Серік Әділов.
Бизнесті қылмыстық жауапкершілікке тартудың екінші негізгі себебі-азаматтық-құқықтық дауларды қылмыстық жауапкершілікке тарту.
«Іс жүзінде біз ҚІЖК-де заңнамалық тыйымға қарамастан азаматтық-құқықтық келіспеушіліктер болған кезде істерді қозғау фактілері бар екенін көреміз.Мысалы, Астана полиция департаменті қытайлық серіктестің шағымы бойынша тіркелген кәсіпкерді қамауға алды. Бірнеше айдан кейін ғана кәсіпкер қылмыс құрамының болмауына және қылмыстық істің тоқтатылуына байланысты босатылды. Үшіншіден, ұйымдасқан қылмыстық топ туралы нормаларды коммерциялық ұйымдарға қолдану. Бұл жағдайда, егер компанияның белгілері дұрыс анықталмаса, оның әрекеттерін қылмыстық ұйымның элементтерімен шатастырудың оңай екенін атап өткен жөн. Мұны ҚМА статистикасы дәлелдейді. Мәселен, соңғы үш жылда ҚК-тің 216 және 262-баптарының жиынтығы бойынша соттарға 32 іс жіберілді. 17-не қатысты айыптау үкімі шығарылды, ал 15-нен ҰҚТ бойынша айыптау алынып тасталды. Бұл заңнаманы, 262 бапты өзгерту уақыты келгенін көрсетеді», - деді «Атамекен» ҚР ҰКП Кәсіпкерлерді құқықтық қорғау департаментінің директоры Серік Әділов.
Ол қазір Мәжілісте ұйымдасқан қылмыс туралы нормаларды коммерциялық ұйымдарға қолдануды болдырмау туралы заң жобасы бар екенін айтты.
