Өткен жылдың қорытындысы бойынша Сот жюриі 77 тәртіптік істі және тәртіптік жазаны мерзімінен бұрын алып тастау бойынша бір материалды қарады. 40 судья тәртіптік жауапкершілікке тартылды. Бұл туралы Орталық коммуникациялар қызметінің алаңында ҚР Жоғары Сот Кеңесі жанындағы Сот жюриінің төрағасы Нұржан Қайыпжан хабарлады, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
Аталған 40 судьяның 31 аудандық деңгейдегі судья, 5 аудандық және оларға теңестірілген соттардың төрағасы, 2 облыстық және оларға теңестірілген соттардың судьялары, 1 облыстық соттың сот алқасының төрағасы және 1 облыстық соттың төрағасы тәртіптік жауапкершілікке тартылды. Барлығы 40 тәртіптік жаза қолданылды, оның ішінде ескерту түрінде – 21, сөгіс түрінде – 13, судья қызметінен босату түрінде – 6.
«30 материал бойынша судьялардың тәртіптік жауапкершілігінің негізгі себебі сот төрелігін жүзеге асыру кезінде заңдылықты өрескел бұзу болды. Судьялық әдеп кодексінің нормаларын бұзу бойынша 6 іс, сот төрағасы және сот алқасының лауазымдық міндеттерін тиісінше орындамау бойынша 4 іс қаралды. Сот жюриі 33 тәртіптік істі немесе қаралған істердің жалпы санының 45,2%-н тоқтатты», - деп атап өтті Сот жюриінің төрағасы Нұржан Қайыпжан.
Оның айтуынша, тәртіптік істерді тоқтатудың себептері негізінен судьяның іс-әрекеттерінде тәртіптік теріс қылық құрамының болмауы және тәртіптік теріс қылық құрамының жеткіліксіздігі болды. Сонымен қатар Жоғарғы Сот Кеңесіне Сот жюриінің 12 шешіміне шағым жасалды. Кеңестің оларды қарау нәтижелері бойынша бұл шағымдардың барлығы қанағаттандырусыз қалды. Яғни, Сот жюриінің барлық шешімі заңды күшіне енді.
