Қазақстанның Сауда және интеграция министрлігінің атына маркетплейстер арқылы сатып алуға қатысты көптеген шағым келіп түседі. Олар сатушымен кері байланыстың жоқтығына, зияткерлік меншік құқығын қорғауға, тауарлардың сапасына және басқаларға қатысты. Ол үшін ведомство заңнаманы жетілдіру бойынша жұмыс жүргізуде. Бұл туралы ОКҚ-да өткен баспасөз мәслихатында вице-министр Әсет Нүсіпов мәлімдеді, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
Оның айтуынша, Парламент Мәжілісінде тұтынушылардың электрондық саудадағы құқықтарын қорғауға бағытталған түзетулер қарастырылуда. Спикер онлайн сауданы дамыту факторларының бірі қойма және логистикалық инфрақұрылымдардың болуы болып табылатынын атап өтті.
«Трансшекаралық онлайн сауданы ынталандыру үшін Қытай тарапы Trans Post және Қазпошта бірлескен кәсіпорны шеңберінде Алматы облысында тарату орталығын және Алматы әуежайының аумағында заманауи мультимодальды қойма салу мәселесі пысықталуда. Меншікті инфрақұрылымы бар, ауданы 100 мың шаршы метр жаңа қазақстандық маркетплейс ТИЗ іске қосылды, жобалық қуатқа шығу кезінде шамамен 10 мың жұмыс орны құрылады. Инвестиция 50 млн долларды құрады. Сондай - ақ ағымдағы жылы Ozon және Wildberries маркетплейстері Астана мен Алматыда жалпы ауданы 29 мың шаршы метр болатын үш фулфилмент орталығын салу жоспарлап отыр, инвестициялар 10 млрд теңгеден асады», - деді Әсет Нүсіпов.
Осылайша, электрондық сауда саласы жаңа жұмыс орындарын құруға, салық түсімдерінің өсуіне және инвестициялар тартуға ықпал етеді. Онлайн сауданы дамыту мыңдаған кәсіпкер үшін, оның ішінде Қазақстан өңірлері үшін нарықтарды қолжетімді етеді. Бизнестің ұлттық және халықаралық деңгейге шығуына кедергілер азайып, сондай-ақ бұл цифрландыруға және қаржылық операциялардың ашықтығын арттыруға ықпал етеді.
