Елордадағы Абай Құнанбайұлы атындағы №87 мектеп-гимназиясында «Балалар кітапханасы» жобасына ерекше көңіл бөлінеді. Оның мақсаты – кітап оқуға және білім алуға қызығушылық қалыптастыру. Осы жоба аясында «8 минуттық оқу» жүйеленді. Яғни, Астана қаласының мектептері сабаққа дейін 8 минут кітап оқиды. «Балалар кітапханасы» жобасы аясында «Ғибрат» бағдарламасы, «Үздік оқырман» оқырмандар клубы сынды іс-шаралар да тұрақты түрде іске асырылады. Бұл жайында Абай Құнанбайұлы атындағы №87 мектеп-гимназиясының аға тәлімгері Данияр Ихсан ОКҚ алаңындағы дөңгелек үстелде айтты, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
Мектеп оқушылары әлеуметтік желілерге түрлі контент әзірлеп, оқыған кітаптарын талдайды.
«Шын жүректен кітап сыйла» челленджі аясында 14 ақпан күні мұғалімдер мен оқушылар бір-біріне көркем шығармалар сыйлап, ерекше атмосфера орнады. «Кітаптар айналымы» акциясында кітап алмасатын арнайы бұрыш ашылды. Одан бөлек Абай мектебінің «Әнді сүйсең, менше сүй», «Зерделі зейін», «Ғибрат», «Ұстаз like», «46-сөз: өз сөзім өзімдікі», «Абай бол» дебат фракциясы, «10 минуттық ән айту», «Абайша ойлан», «Абай құндылықтары негізінде оқыту және тәрбиелеу», «Құнанбай» әкелер мектебі, «Зере» әжелер мектебі сынды жобалар осы тәрбие бағдарламасына кіріктірілді», – деді спикер.
«Адал азамат» біртұтас тәрбие бағдарламасы бойынша құндылықтарға негізделген білім беру жүйелі түрде іске асырылып, түрлі жоба енгізілген. Әсіресе, оқушының бойына жалпыадамзаттық және ұлттық құндылықтарды сіңіру, білімді, тәрбиелі,адал оқушы шығаруды басты мақсат еткен істер жетіп артылады.
