Коммуналдық желілерді жаңарту мәселесін шешу мақсатында былтыр желтоқсан айында «Энергетикалық және коммуналдық секторларды жаңғырту» ұлттық жобасы қабылданды. Жобаны іске асыру шеңберінде 32 кәріз-тазарту құрылыстарын (КТҚ) қайта жаңарту және 13-ін салу жоспарланған. Оның ішінде 8 жобаны халықаралық қаржы ұйымдарының қаржысы есебінен, 14 жобаны «Бәйтерек» ҰБХ облигациялық қарызы есебінен және 23 жобаны республикалық бюджеттен қаржыландыру көзделген. Жалпы, Қазақстанда Ұлттық жобаның қалай жүзеге асырылатыны туралы ҚР Өнеркәсіп және құрылыс министрлігі Құрылыс және ТКШ істері комитетінің төрағасы Бақытжан Жүнісбеков ОКҚ алаңында өткен баспасөз конференциясында айтты, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
Энергетикалық және коммуналдық секторларды жаңғырту жөніндегі ұлттық жоба аясында келесі бағыттар бойынша міндеттер қойылды:
- желілердің тозуын 40%-ға дейін төмендету, апаттарды азайту арқылы коммуналдық инфрақұрылымды жақсарту, сондай-ақ коммуналдық қызметтердің сапасын арттыру;
- электр энергиясын өндіру. Жаңа көздерді салу және қосымша көздерді енгізу, сондай-ақ жұмыс істеп тұрған өндіруші қуаттарды жаңарту жоспарлануда;
- жеңілдікпен ұзақ мерзімді қаржыландыру;
- отандық өнеркәсіпті дамыту, импортқа тәуелділікті төмендету жолымен елішілік құндылықты арттыру.
«Жабдықтардың айтарлықтай тозуы, ескірген технологиялар үзілістерге, азаматтардың өмір сүру сапасының төмендеуіне және елеулі экологиялық және экономикалық шығындарға алып келеді. Проблемаларды шешу үшін ұлттық жоба шеңберінде шамамен 13 трлн теңге көлемінде инвестиция тарту жоспарда бар. Энергетикалық және коммуналдық секторларды жаңғырту жөніндегі ұлттық жоба шеңберінде техникалық оператор болып «Қазақстандық ТКШ жаңғырту және дамыту орталығы» АҚ анықталды. Техоператор инфрақұрылымды жаңғырту сапасына, құзыретті тәуелсіз техникалық сарапшыларды тартуға, технологиялық сараптама жүргізуге, үздік технологиялар мен жабдықтарды ұсынуға, сондай-ақ жобалар мен құрылыс-монтаждау жұмыстарының іске асырылу барысына мониторинг жүргізуге және бақылауға жауапты болады. Ұлттық жобаны қаржы операторы ретінде «Бәйтерек» ҰБХ» АҚ белгіленді», –деп түсіндірді Бақытжан Жүнісбеков.
Сондай-ақ спикердің айтуынша, Ұлттық жобада коммуналдық қызметтердің өндірістік процестерін автоматтандыру және ресурстарды нақты уақытта есепке алу бойынша жобаларды іске асыру көзделген. Бұл жұмыс SCADA жүйесі арқылы жүргізіледі. Комитет төрағасы хабарлағандай, бұл жобаны облыс орталығы болып табылатын 20 қалада, республикалық маңызы бар қалаларда және Астанада ТКШ ақпараттық жүйесімен интеграциялай отырып іске асыру жоспарлануда.
«Бірінші кезеңде сумен жабдықтау және су бұру секторы бойынша жұмыстар басталды. Қазақстан Республикасының Өнеркәсіп және құрылыс министрлігі үлгілік техникалық тапсырма әзірлеп, әкімдіктерге тиісті тапсырмалар берді. Жалпы, өндірістік процестерді автоматтандыру инфрақұрылымды дамытудың оңтайлы модельдерін құру есебінен су арнасы, сондай-ақ сумен жабдықтау және су бұру жүйесін салуға және реконструкциялауға мемлекеттік бюджеттің болашақ шығындарын оңтайландыруға мүмкіндік береді. Яғни, су шығыны 15-40%-ға, желілердегі апаттылық 30-50%-ға, сондай-ақ электр энергиясы шығыны 15-20%-ға төмендейді деп күтілуде», – деп түйіндеді Бақытжан Жүнісбеков.
