Еліміздің спорт саласындағы заңнаманы жетілдіру жұмыстары тұрақты негізде жүргізіліп жатыр. Бүгінде ҚР Туризм және спорт министрлігі салалық заңға өзгерістер мен толықтырулардың екінші пакетін әзірлеуде. Туризм және спорт вице-министрі Серік Жарасбаев ОКҚ алаңында өткен баспасөз конференциясында мәлімдегендей, олардың ішінде балалар мен жасөспірімдер спорт мектептерінде жан басына шаққандағы нормативтік қаржыландыру ұғымдары мен өкілеттіктерін айқындау, уәкілетті органға әдістемені, жан басына шаққандағы қаржыландыру қағидаларын, балалар мен жасөспірімдер спорт мектептерінің мемлекеттік тапсырысын орналастыру қағидаларын және балалар мен жасөспірімдер спорт мектептерін аккредиттеу қағидаларын бекіту бойынша құзыреттер беру сынды тетіктер бар, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
«Бұл бағытта Министрлік тиісті жұмысты бастап кетті. Негізгі республикалық бюджеттік комиссияның отырысында қаралған бұл мәселе. Оң шешімін тапқан болатын. Бұл жоспар 2026 жылдың 1 қаңтарынан бастап енгізуді жоспарлап отырмыз. Сонымен қатар 2-толқын ішінде жаттықтырушылардың еңбекақысын одан әрі арттыру мақсатында Министрлік тиісті жұмыстарды жүргізіп, жаңартылған бірыңғай спорттық стандарттар бойынша бағдарламаларды іске асырғаны үшін орташа еңбекақысын шамамен 30%-ға арттырады деген сенімдеміз», – деді вице-министр.
Сондай-ақ бұл жұмысты цифрландыру көзделіп отыр. Мәселен, «Дене шынықтыру және спорттың (Е-спорт) цифрлық платформасын» іске асыру шеңберінде былтыр пилоттық режимде 3 негізгі модуль іске қосылды. Оның ішінде «Спортшылардың, жаттықтырушылардың, төрешілер мен әдіскерлердің паспорттарының бірыңғай базасы», «Спорттық-бұқаралық іс-шаралардың «электрондық күнтізбесі», «Спорт нысандарының бірыңғай тізілімі» жобалары бар.
Айта кетерлігі, дене шынықтыру мен спортты басқару жүйесін жетілдірудің облыстардың, республикалық маңызы бар қалалардың және астананың спортшыларын даярлауды жүзеге асыратын өңірлік дене шынықтыру-спорт ұйымдарын, жоғары жетістіктер спортын дамытуды уәкілетті органның құзыретіне беру қарастырылуда. Спорт саласының басқару жүйесіндегі жаңашылдықтар мен күрделі заңнамалық өзгерістер еліміздің халықаралық аренадағы беделін одан әрі нығайтуға тың серпін береді. Қазіргі таңда ведомство Балалар, жасөспірімдер жоғары спорт мектебі, спорт-интернат мектептері, Олимпиадаға даярлау орталықтарын өңірлік деңгейден республикалық деңгейге ауыстыру жұмыстарын жүргізіп жатыр.
