ҚР Көлік министрлігі жол құрылысы мен оны күтіп-ұстау саласындағы ғылыми тәсілге ерекше мән береді. Мемлекет басшысының бастамасымен өткен жылы жол және жол құрылысы жұмыстарымен 12 мың шақырымға жуық автожол қамтылды. Биыл 13 мың шақырымды қамту жоспарда бар. Осыған байланысты ғылым тиімді, қауіпсіз және экономикалық тұрғыда негізделген шешімдер қабылдаудың негізі ретінде басты рөл атқаруға тиіс. Жол саласындағы заманауи технологиялық шешімдер туралы ОКҚ алаңында ҚР КМ Автомобиль жолдары комитеті төрағасының орынбасары Анар Ғабдуллина айтып берді.
Спикер атап өткендей, Көлік министрлігі Автомобиль жолдары комитеті мен «ҚазжолҒЗИ» АҚ халықаралық тәжірибеге, сондай-ақ өздерінің ғылыми-қолданбалы әзірлемелеріне сүйене отырып, отандық ғылыми базаны белсенді дамытып жатыр.
«Заманауи цифрлық және технологиялық шешімдер жасалып, енгізілуде. Қазіргі уақытта институт базасында жол-құрылыс материалдары мен жаңа технологиялардың бірыңғай базасы ашылды. Бұл базаға 222 карьер, 408 асфальтбетон зауыты және 153 жаңа технологиялар мен материалдар енгізілді. Олар санат бойынша бөлінеді. Сондай-ақ нормативтік техникалық базаға талдау жүргізілді. Оның қорытындысы бойынша 900-ден астам ғылыми-техникалық құжаттар оңтайландырылды», – деді Анар Ғабдуллина.
Ол Superpave технологиясы бойынша жол төсемдерін жобалаудың халықаралық стандарттары енгізіліп жатқанын айтты. Сондай-ақ көпір құрылыстарының базасы құрылды. Мұнда көпірлерді зерттеу нәтижелері туралы ақпарат енгізіледі. Ағымдағы жылы институт қозғалыстың қабаттасуынсыз жасырын ақауларды анықтауға мүмкіндік беретін мобильді жүйелерді, көпір құрылымдарын жедел диагностикалауды іске қосты. Технология инженерлік шешімдерді қабылдауды жеделдетуге мүмкіндік береді.
«Соңғы жылдары отандық ғалымдар мен инженерлер бірқатар маңызды бастаманы жүзеге асырды. Атап айтқанда, бұл: жаңа буынға арналған көктайғаққа қарсы реагент, жол белгілеуге арналған органикалық ерітінділік бояу, полимерлі битумды дайындауға арналған құрылғы. Бұл жұмыс ағымдағы жылы да жалғасады. Сонымен қатар ел тарихында алғаш рет бір мезгілде 70-тен астам жаңа материалды далада тестілеу өткізіледі, бұл ең тиімді шешімдерді іріктеп алуға және енгізуге мүмкіндік береді», - деп атап өтті спикер.
Спикердің айтуынша, Жол қауіпсіздігінің бірінші ұлттық стратегиясын әзірлеу басталды, оның мақсаты — жолдардағы өлім-жітімді азайту. Ғылыми мектептерді дамытуға және білікті кадрларды даярлауға ерекше көңіл бөлінеді.
