Бүгінде Шымкент қаласында «Таза Қазақстан» экологиялық бағдарламасы аясындағы тазалық іс-шаралары тұрақты түрде жалғасып келеді. Сенбіліктерге қала тұрғындары, әсіресе, жастар белсенді түрде атсалысып жүр.
Мәселен, бүгін Шымкент қаласынан ағып өтетін Бадам өзенінің бойында «Таза жағалау» акциясы өтті. Аталған тазалық шарасына қалалық Жастар ресурстық орталығының қызметкерлері мен 80-ге жуық ерікті жастар қатысты. Олар өзен бойындағы күл-қоқыстар мен өзен аңғарындағы қураған ағаш бұталар тазартып, шөбін орды.
