Павлодар қалалық №1 ауруханасында ұйқыбездің қатерлі ісіктерін емдеуге бағытталған абдоминалды хирургиядағы ең күрделі операциялардың бірі — панкреатодуоденалды резекция бойынша мастер-класс өтті. Операция шамамен 4–5 сағатқа созылды, деп хабарлайды No-comment.kz - ҚР Денсаулық сақтау министрлігіне сілтеме жасап.
Хирургиялық араласуды медицина ғылымдарының докторы, Ресей медицина ғылымдары академиясының академигі, Қазақстан Республикасы Ұлттық ғылым академиясының корреспондент-мүшесі, профессор Болатбек Баймаханов жүргізді.
Мұндай операция жасау аурудан толық айығуға 20–30% жағдайда мүмкіндік береді, ал қалған жағдайларда пациенттің өмір сүру сапасы мен ұзақтығын айтарлықтай жақсартады.
Өткен жылдан бері аурухананың базасында Механикалық сарғаю орталығы жұмыс істейді. Осы орталықтың шеңберінде осындай операцияларды тұрақты түрде өткізу, өңірлік практиканы дамыту және облыс тұрғындарына жоғары технологиялық медициналық көмектің қолжетімділігін арттыру жоспарланған.
Мекемеде осындай операцияларды жасау мүмкіндігі А корпусының қайта жаңғыртылып, заманауи жабдықтармен жарақталуының арқасында мүмкін болды. Бұрын мұндай диагноз қойылған пациенттер онкологиялық орталықтар мен астана клиникаларына жіберілетін.
Мастер-кластың қорытындысы бойынша Сызғанов атындағы ұлттық ғылыми хирургия орталығы, Павлодар облысының денсаулық сақтау басқармасы және №1 қалалық ауруханасының арасында бірлескен жұмыс туралы меморандумға қол қойылды. Құжат тәжірибе алмасу, жаңа технологияларды енгізу, оқу-ағарту және ғылыми-практикалық жобаларға қатысу, сондай-ақ медицина қызметкерлерінің біліктілігін арттыруды көздейді.
