Спикер хабарлағандай, 1 маусымнан бастап «Орал-Маңғыстау» қатынасында пойыз құрамында әйелдерге арналған қосымша вагон іске қосылады. Осылайша, «Әйелдер вагоны» қызметі бар маршруттардың жалпы саны 12-ге жетеді. Спикер жолаушылар тасымалының қолжетімділігін арттыруға бағытталған онлайн қызметтерді дамытуға айтарлықтай көңіл бөлінетінін айтты.
«Бүгінгі таңда жол жүру құжаттарын онлайн-сатудың үлесі 80%-ды құрайды. Өздеріңіз білетіндей, жоғары сұраныс кезеңінде «күту парағы» бойынша билеттерді ресімдеу бойынша қызмет жақсы жұмыс істейді», – деді Жәнібек Тайжанов.
Сонымен қатар жолаушыларға пойыздар арасында ауысу арқылы межелі жерге ыңғайлы жетуге мүмкіндік беретін «Ауысыммен жол жүру» қызметі қолжетімді. 2024 жылы функционалдылық кеңейтілді: енді билеттерді бір құрамның ішінде сатып алуға болады. Сондай-ақ ұлттық тасымалдаушының сайтында «Жолаушылар пойыздарының қозғалысының онлайн-таблосы» іске қосылды.
«Сервис жолаушыға оны қызықтыратын бағыт туралы ақпарат алуға мүмкіндік береді. GPS трекерлері «ЖТ» АҚ жолаушылар пойыздарының 99 маршрутына орнатылған. Бір жыл ішінде жеке тасымалдаушылар да осы жүйеге қосылады. Жолаушыларға ыңғайлы болу үшін барлық пойызда ішкі WI-Fi арқылы мультимедиялық контентке қол жеткізу қамтамасыз етілді», – деп атап өтті ол.
Сонымен қатар спикердің айтуынша, «Тальго» пойыздарында пилоттық жоба аясында спутниктік интернет қосылған.
«Қазір интернет Астана – Алматы және Астана – Өскемен бағыттары бойынша «Тальго» пойыздарында қосылған. Тест қорытындысы бойынша барлық пойызды кезең-кезеңімен жоғары жылдамдықты желімен қамтамасыз ету жоспарлануда. Келесі жылдың басынан 14 пойызға осы қызмет енгізіледі», – деді ол.
Жәнібек Тайжанов мүмкіндігі шектеулі жандарға жағдай жасалып жатқанын айтты. 2024 жылы теміржол көлігімен мүмкіндігі шектеулі 533 мыңнан астам жолаушы тасымалданды. Әлеуметтік маңызы бар облысаралық маршруттар бойынша 108 құрам жұмыс істейді. Оның ішінде ерекше қажеттіліктері бар адамдарға арналған вагондармен 99 құрам қамтамасыз етілді. Биыл парктің жыл сайынғы жаңартылуын ескере отырып, әрбір құрам 100%-ға арнайы вагондармен қамтамасыз етілетін болады.
«Облысаралық бағыттар бойынша жүретін пойыздардың барлық құрамында мүгедектер арбалары бар. Өздеріңіз білетіндей, бүгінде барлық мүгедектік тобындағы адамдар үшін жол жүруге 50% жеңілдік бар. Халықтың өтініштеріне сәйкес Тасымалдау ережелеріне мүгедектіктің I және II топтарына, сондай-ақ ерекше қажеттіліктері бар балаларға 50% жеңілдік беру бөлігінде өзгерістер енгізілді. Бұл түзетулер 2025 жылғы 22 сәуірде күшіне енді», – деп түйіндеді спикер.
