Спикердің айтуынша, омбудсмендер мәселелерді жедел шешіп, қиын жағдайға тап болған студенттерге қолдау көрсетті.
«Омбудсмендер институтының мақсаты студенттердің құқықтары мен заңды мүдделерін тиімді қорғауды қамтамасыз ету, сондай-ақ еліміздің жоғары оқу орындарында қауіпсіз және әділ білім беру ортасын құру болып табылады. Биыл Шымкент қаласында тест режимінде 2ГИС платформасында және әлеуметтік желілерде студенттердің пікірлеріне талдау жүргізілді. Нәтижелер жекелеген жоғары оқу орындарында бірқатар жүйелік проблеманың бар екенін көрсетті. Талдау негізінде есеп жасалып, оқу орындарының басшылығына жіберілді. Қазіргі уақытта бүкіл ел бойынша осындай мониторинг жүргізілуде. 2025 жылдың шілде-тамыз айларында омбудсмендер бұрын анықталған бұзушылықтарды жою бойынша мониторинг жүргізеді», – деді спикер.
Студенттік омбудсмендер де 200-ден астам іс-шара өткізді. Бұл – құқық қорғаушылармен кездесулер, спорттық және шығармашылық конкурстар, пікірсайыс турнирлері, экологиялық акциялар, сондай-ақ студенттердің белсенді өміріне тарту бойынша түрлі іс-шаралар. Сонымен қатар биыл ЖОО жатақханалары мен корпустарына 100-ден астам жоспарлы мониторинг, сондай-ақ студенттердің өтініші бойынша 20-дан астам жоспардан тыс іс-шаралар өткізілді. Жүйелік мәселелерді және оларды шешу жолдарын анықтау үшін жатақханаларда, оқу ғимараттарында тексерулер жүргізілді.
Спикердің айтуынша, бұл шағымдарға жедел ден қоюға және бүкіл ел бойынша ЖОО студенттерінің өмір сүру жағдайларын жақсартуға мүмкіндік берді.
«Биыл Астанада алғаш рет «Студенттік омбудсмен мектебі» жобасы іске асырылды. Бұл – студенттер қауымдастығының белсенді және құзыретті өкілдерін даярлауға арналған білім беру бағдарламасы. Қатысушылар адам құқықтары, коммуникация дағдылары, жанжалдарды шешу және ЖОО әкімшілігімен өзара іс-қимыл бойынша тренингтерден өтті. Бұл мектеп студенттер арасында жаңа көшбасшыларды қалыптастырудың маңызды алаңына айналды. Биыл еліміздің барлық жоғары оқу орнында студенттік омбудсмендер сайланды», – деді Тоқтар Болысов.
