Басқару жүйесін реформалау аясында облыстық дене шынықтыру және спорт басқармасы басшыларын тағайындау тәртібі өзгерді. Енді үміткерлерді бекіту министрлік жанынына арнайы құрылған комиссияның келісімімен жүзеге асады. Кандидаттардың стратегиялық ойлау қабілеті, кәсіби тәжірибесі, басқарушылық әлеуеті және өңірлік спортты дамытуға қатысты көзқарасы жан-жақты сараланып, шешім қабылданады. Қазіргі таңда 12 өңірде басқарма басшылары тағайындалды.
Министрлік заманауи білім мен технологияларды спорт саласына енгізуге де басымдық беруде. Мәселен, Performance Hub ғылыми-зерттеу тобының базасында бокс, шорт-трек, мәнерлеп сырғанау, конькимен жүгіру, биатлон, семсерлесу, еркін күрес, таэквондо және басқа да спорт түрлері бойынша кешенді ғылыми тестілеу жүргізіліп жатыр. Бүгінге дейін 16 спорт түрінен (оның ішінде 10 жазғы және 6 қысқы) 150-ден астам спортшы сынақтан өтті. Сонымен қатар ұлттық құрамалар мен бапкерлерге арналған арнайы семинарлар ұйымдастырылуда. Атап айтқанда, велоспорт бапкерлеріне арналған семинар, биатлоннан ұлттық және жастар құрамаларына арналған дәрістер өткізілді. Бұл іс-шараларға спорттық медицина мамандары мен Дене шынықтыру және бұқаралық спорт академиясының ғалымдары да тартылды.
Астанадағы Ұлттық спорт университеті болашақта спорт ғылымының ірі орталығына айналмақ. Университет инфрақұрылымы мамандар даярлау және қолданбалы зерттеулер жүргізу үшін бейімделген. Жоба аясында ұлттық құрамаларға арналған жоғары білікті бапкерлер, спорт менеджерлері, психологтар және спорт ғылымының өзге де мамандары даярланады. Университет базасында көркем гимнастика, бокс, таэквондо, дзюдо, грек-рим және еркін күрес, академиялық есу, баскетбол, волейбол, шағын футбол, жеңіл атлетика және жүзу секілді спорт түрлерінен ұлттық құрамалардың халықаралық жарыстарға дайындығын қамтамасыз етуге барлық жағдай жасалған.
Сонымен қатар министрлік отандық спортқа шетелдік тәжірибені де енгізіп жатыр. Мәселен, дзюдодан Қазақстан ұлттық құрамасына Олимпиада чемпионы, әлем чемпионаттарының екі дүркін күміс жүлдегері Эцио Гамба жетекшілік ететін командада халықаралық аренада тиімділігін дәлелдеген заманауи дайындық әдістері енгізіле бастады. Бұдан бөлек, Лос-Анджелестегі Олимпиадаға дайындық аясында 2024 жылдың қазан айынан бастап семсерлесуден Қазақстан ұлттық құрамасында шетелдік маман Александр Горбачук жаттықтырушы-кеңесші ретінде жұмыс істеп келеді. Оның шәкірттері Ванкуверде (Канада) өткен Әлем кубогінде командалық есепте – қола, Боготадағы (Колумбия) жекелей сында Руслан Құрбанов күміс медаль жеңіп алғанын атап өткен жөн.
