«Кассациялық соттардың құрылуы Жоғарғы Сот рөлінің өзгеруіне тікелей байланысты. Бұрын Жоғарғы Сот заңды күшіне енген шешімдерді қайта қараудың негізгі сатысы болған. Енді ол сот практикасының біркелкілігін қамтамасыз етуге назар аударады және істерді тек ерекше жағдайларда ғана қарайды. Яғни, Жоғарғы Сот судьясының ұсынысы немесе Бас Прокурордың наразылығы бойынша. Кассациялық соттардың негізгі рөлі сот актілері заңды күшіне енген істерді қайта қарау болып табылады. Мәселен, әр кезең ықтимал сот қателіктерін анықтауға және түзетуге бағытталған көп деңгейлі сот төрелігі қағидаттары күшейтіледі», – деді Ерлан Айтжанов.
Спикердің айтуынша, бұл Жоғарғы соттың назарын құқық қолданудың негізгі мәселелеріне аудара отырып, оның жүктемесін азайтуға мүмкіндік береді. Қосымша инстанцияны енгізудің арқасында азаматтардың сот төрелігіне қолжетімділігі кеңейтіледі. Сонымен қатар заңдылықты дәлірек бақылау арқылы сот шешімдерінің сапасы артады. Францияда, Италияда, Нидерландыда мұндай инстанциялар әділеттілікті қамтамасыз етудің қосымша тетігі ретінде қызмет етеді.
«2024 жылдың 14 қазанында судьялардың IX съезінде Мемлекет басшысы заңнаманың қатаң талаптарына сәйкес келетін тәжірибелі және кәсіби мамандарды кассациялық соттарға іріктеу міндетін қойды. Осылайша, Президент кассациялық соттардың кадрлық құрамы неғұрлым тәжірибелі судьялар қатарынан құрылуға тиіс екенін атап өтті. Мемлекет басшысының неғұрлым тәжірибелі судьялар қатарынан кассациялық соттардың кадр құрамын қалыптастыру жөніндегі тапсырмасын орындау мақсатында ағымдағы жылдың 22 қаңтарында Жоғары Сот Кеңесі 87 бос судья лауазымына конкурс жариялады: азаматтық істер жөніндегі кассациялық сот – 39 бос орын; қылмыстық істер жөніндегі кассациялық сот – 29 бос орын; әкімшілік істер жөніндегі кассациялық сот – 19 бос орын», – деп қосты Ерлан Айтжанов.
