Бірінші деңгейде 161 медициналық ұйым бар - бұл ауылдық және аудандық ауруханалар. Мұнда шұғыл алғашқы көмек көрсетіледі, зардап шеккендердің жағдайын алғашқы диагностикалау және тұрақтандыру жүргізіледі. Хирургиялық араласу қажет болған жағдайда пациент келесі деңгейге жіберіледі. Екінші деңгейге 52 медициналық ұйым - орталық аудандық және қалалық ауруханалар кіреді. Бұл кезеңде хирургиялық араласу жүргізіледі, сонымен қатар ұзақ мерзімді емдеу және оңалту қамтамасыз етіледі. Жоғары технологиялық көмек алу қажет болған жағдайда пациенттер үшінші деңгейге жіберіледі - бұл облыстық ауруханалар, республикалық және Ұлттық медициналық орталықтар. Ел бойынша 51 мекемеде жоғары технологиялық мамандандырылған медициналық көмек көрсетіледі. Бұл ұйымдар жүйенің соңғы буыны болып табылады және травматологиялық-ортопедиялық көмектің толық спектрін ұсынады.
«Қазақстанда травматологиялық көмек көрсету үшін көпсалалы ауруханаларда 152 травматологиялық және күйік бөлімшелері, сондай-ақ 78 травматологиялық пункт ұйымдастырылды. Мысалы, тек жарақат пунктіне 2024 жылы 1 млн 210 мың адам жүгінген. Амбулаториялық емханаларда 262 травматологиялық кабинет ашылды. 2024 жылы емханаларда травматологиялық кабинеттерге бару саны 1 млн 389 мыңды құрады», - деді Олжас Бекарысов.
Сондай-ақ спикердің ақпараты бойынша, 2024 жылдың басында елде 1508 травматолог тіркелген, олардың 174-і ауылдық жерлерде жұмыс істейді. 490 дәрігердің бірінші, жоғары біліктілік санаты бар. 2024 жылы травматологтармен қамтамасыз етудің орташа республикалық көрсеткіші 10 мың тұрғынға шаққанда 0,7-ге тең болды. Аймақтар бойынша жүргізілген талдаулар травматологтардың, әсіресе, ауылдық жерлерде тапшылығын көрсетеді. Осыған байланысты мемлекет және жергілікті атқарушы органдар есебінен бөлінетін гранттар саны кеңеюде. Сонымен қатар спикер соңғы бес жылда жарақаттан болатын өлім-жітім көрсеткіші кем дегенде 19%- ға төмендегенін хабарлады.
«Барлық себеп бойынша Қазақстандағы өлім-жітімнің жалпы көрсеткішіндегі жарақаттан болатын өлім-жітімнің үлесі 8%-ды құрады. Жазатайым оқиғалардан болатын өлім-жітім құрылымында ЖКО-дан болатын өлім-жітім үлесі 23,5%-ды құрайды. Жарақаттан болатын өлім көрсеткіші бойынша 9 облыс қызыл аймаққа кірді. Ұлытау, Атырау облыстарында және Астана қаласында жарақаттан болатын өлім-жітім көрсеткіштерінің төмендеуі байқалады. ЖКО-дан болатын өлім- жітім бойынша еліміз ЭЫДҰ елдерінен әлдеқайда артта қалып отыр», - деді ол.
Бас прокуратураның мәліметінше, 2024 жылы Қазақстанда жол-көлік оқиғалары санының күрт өсуі байқалды - 98,9%. Егер 2023 жылы 15 886 ЖКО болса, 2024 жылы — 31 597 жағдай тіркелді. Бұл өсім себептерінің бірі есепке алу әдістемесінің өзгеруі болды: енді статистикаға апатқа қатысушылар денсаулыққа келтірілген зиянның дәрежесіне қарамастан медициналық көмекке жүгінген барлық жағдай енгізілді. Еліміздегі барлық ЖКО-ның 55%-ы алты өңірге тиесілі. Олар: Алматы қаласы, Алматы облысы, Жамбыл облысы, Астана, Ақтөбе облысы және Шымкент. 2024 жылдың 12 айында ЖКО-да 40 873 адам зардап шекті, оның ішінде 2 452 адам қаза тапты. 80 км/сағ жоғары жылдамдықта жаяу жүргіншіні қағып кеткен кезде оның қаза болу ықтималдығы 90%-дан асады. Қалалық ортада жылдамдықты 60-тан 50 км/сағ-қа дейін төмендету жаяу жүргіншілер өткелдеріндегі өлім-жітімді 30-40%-ға азайтуға мүмкіндік береді. Халықаралық тәжірибе жылдамдық режимінің сақталуын ішінара бақылаудың өзі ЖКО санын 20-25%-ға төмендете алатынын растайды. ДДҰ статистикасы бойынша қауіпсіздік белдіктерін пайдалану өлім қаупін 40-50%-ға, ауыр жарақат алу қаупін 25%-ға төмендетеді.
