Спикер соңғы 10 жылда елдегі туберкулез бойынша эпидемиологиялық жағдай айтарлықтай жақсарғанын атап өтті. Осы уақытта оның таралу деңгейі 52%-ға төмендеді. Өлім-жітім көрсеткіші 75,6%-ға азайды. Пациенттердің белсенді контингенті 56%-ға төмендеді. Мәселен, ағымдағы жылдың 6 айының қорытындысы бойынша 8092 туберкулезбен ауыратын науқас есепте тұр. «Паллиативті» деп аталатын топтағы пациенттердің саны 82,1%-ға азайды. Алты айдың қорытындысы бойынша 89 пациент есепте тұр. Қазақстанның алғашқы медициналық-санитариялық көмек мекемелерінде туберкулезді диагностикалаудың заманауи әдістері енгізілді. Бұл технологиялар аурудың болуын және туберкулез микобактерияларының дәрілік сезімталдығын екі сағат ішінде анықтауға мүмкіндік береді.
«Gene Xpert деп аталатын мұндай зерттеу МСАК желісі деңгейінде қолжетімді және аудандық деңгейде мүлдем тегін. Бүгінде республика бойынша 148 аппарат бар», – деді Мәлік Аденов.
Сонымен қатар еліміздің барлық облыстық фтизиопульмонологиялық орталығында заманауи жабдықтары бар бактериологиялық зертханалар жұмыс істейді. Мұнда дәрілік сезімталдықтың барлық спектрін анықтауға және пациенттерге ең тиімді емдеуді тағайындауға болады. Флюорографиялық скринингтердің тиімділігі 100 мың тексерілгенге 2,4 жағдайды құрады. Елімізде туберкулезбен ауыратын науқастарды емдеу үшін 455 фтизиатр кабинеті және бақыланатын ем жүргізу үшін 2564 кабинет жұмыс істейді. Емнің амбулаториялық кезеңінде алты айдың қорытындысы бойынша 5955 пациент бар, олардың 37%-ы ем-домды онлайн режимінде алады.
Бұдан бөлек, Қазақстанда туберкулез инфекциясы мен туберкулезді диагностикалау үшін мынадай әдістер қолданылады: Манту сынамасы, АТР (туберкулез рекомбинантты аллергені бар сынама - Диаскинтест) және квантиферон сынағы (IGRA сынағы).
