Қазіргі таңда Алматыда жергілікті климатқа бейімделген ағаш пен бұта көшеттерін өсіретін арнайы алаң жоқ. Бұл көгалдандыру жүйесінің дамуын тежеп, апатты және қураған ағаштарды алмастыруды, сондай-ақ кесілген ағаштың орнына тал егу жұмыстарын қиындатады. Өз тәлімбағы болмаған қала әрдайым сырттан тасымалданатын көшеттерге тәуелді. Бұл отырғызылатын материалдың сапасы көңілден шықпауына немесе шығынның көп болуына апарып соқтыруы мүмкін.
Жүргізілген зерттеу нәтижесінде жаңа питомникке лайық орын анықталды. Аумағы 150 гектар болатын жер бедері тегіс, топырағы құнарлы, климаты қолайлы жер телімі таңдалған. Осындай ауқымды тәлімбақ салу Алматының жасыл қорын тұрақты түрде толықтырып отыруға мол мүмкіндік береді. Мұнда жыл сайын миллиондаған көшет өсіріліп, агроорман шаруашылығының инфрақұрылымы дамып, қала экологиясына жеке инвестиция тарту жолға қойылмақ.
Өз тәлімбағының болуы Алматыға жергілікті ауа райына төзімді көшеттерді өсіруге жол ашады. Бұл климаттың құбылмалы болып, жаздың құрғақ, қыстың аязды келетін жағдайында аса маңызды. Мұндай шешім аудандарды көгалдандыруды жеңілдетіп, қауіпті ағаштарды дер кезінде алмастырып, жаңа жасыл желекті уақытылы отырғызуға мүмкіндік береді.
Бұған қоса, көшет материалын сырттан сатып алу шығыны қысқарып, қала бюджетінің жүктемесі жеңілдейді. Ал бұл болашақта қаланың жасыл желегін ұдайы толықтырып отыруға бағытталған кесілген ағаштың орнына егілетін көшеттердің тұрақты жүйесін қалыптастырады.
Экологтар мен урбанистер қаланың қарқынды өсуі мен климаттың өзгеруі жағдайында мұндай қадамдардың аса маңызды екенін атайды. Шаһар жай ғана ағаш отырғызумен шектелмей, енді оларды өзі өсіре бастайды.
