Алматы қаласында өткен «Жас бүркіт-2026» әскери-патриоттық жастар жиыны жас буынның әскери даярлығы мен патриоттық рухын нығайтуға бағытталған маңызды алаңға айналды. Ауқымды іс-шараға қаланың сегіз ауданынан келген мектеп оқушылары мен әскери-патриоттық клубтардың мүшелері қатысты.
Жалпы саны 15 команда әскери-спорттық сайыс барысында өздерінің дене дайындығын, тәртіп пен ұйымшылдығын, сондай-ақ тактикалық қабілеттерін жан-жақты көрсетті. Қатысушылар әртүрлі кезеңдерде жылдамдық, дәлдік және командалық үйлесімділік бойынша сынға түсті.
Жарыс қорытындысы барлық кезеңдер бойынша көрсетілген уақыт нәтижелерінің жиынтығы негізінде анықталды. Нәтижесінде №136 мектеп-гимназиясының «Жас сарбаз» командасы үздік нәтиже көрсетіп, бірінші орынды иеленді. Екінші орын М.Ломоносов атындағы №38 қазақ-ресей гимназиясының «Қаһарман» командасына бұйырса, үшінші орынды М.Жұмабаев атындағы №137 мектептің «Жас сарбаз» командасы жеңіп алды.
Жеңімпаздар Ұлттық ұланның «Оңтүстік» өңірлік қолбасшылығы атынан генерал-майор Сакентай Шекарбековтың кубогы және арнайы дипломдармен марапатталды.
Бұл жиын жас ұрпақтың әскери қызметке қызығушылығын арттырып, ел қорғаны болуға деген жауапкершілігін күшейте түсті.
