Алматы қаласының Бостандық ауданында 2026 жылы инженерлік инфрақұрылымды кешенді жаңғыртуға бағытталған ауқымды жобалар жүзеге асырылуда. Бұл жұмыстардың нәтижесінде 25 мыңнан астам тұрғын сапалы коммуналдық қызметке қол жеткізеді.
Жоба аясында жалпы ұзындығы 99 шақырым болатын су және кәріз желілері салынады, оның 66 шақырымы – ауыз су жүйесі, ал 33 шақырымы – су бұру арналары. Сонымен қатар 154 шақырым электр желісі жаңғыртылып, олардың тозу деңгейі қазіргі 50%-дан 25%-ға дейін төмендейді. Газ инфрақұрылымы да назардан тыс қалмайды — 5,2 шақырым газ құбыры қайта жаңартылады.
Нұрлытау шағынауданында тәулігіне 9 000 текше метр су өндіретін жаңа су тарту нысаны мен сорғы станциясының құрылысы аяқталмақ. Бұл жобаның жалпы құны 19 млрд теңгені құрайды.
Жылумен жабдықтау саласында 10,9 шақырым желіні жаңарту бойынша 18 жоба іске асырылады. Сонымен қатар су басу қаупінің алдын алу үшін қуаттылығы сағатына 400 текше метр болатын кәріз сорғы станциясы салынып, тереңдігі 100-400 метрлік ұңғымалар қазылады.
Жалпы, бұл бастамалар аудан инфрақұрылымының сенімділігін арттырып, тұрғындардың өмір сүру сапасын жаңа деңгейге көтереді.
